“U yerda na ko‘mir va na gaz bor, shunchaki chirindi tutagan”. Mas’ullar Chiroqchida yerning cho‘g‘ bo‘lib yonishiga izoh berdi
Internetda Qashqadaryo viloyatining Chiroqchi tumanidagi “Xo‘ja Abdujabbor” qishlog‘ida yer cho‘g‘ bo‘lib yonayotgani aytilgan video tarqaldi. Holatni izohlagan viloyat Ekologiya boshqarmasi cho‘g‘ yer ostida qolib ketgan qamishlar qizishi va chirishi natijasida yuzaga kelganini bildirdi.
“Daryo” muxbiri voqea tafsilotlarini o‘rgandi.
Ma’lum bo‘lishicha, Chiroqchi tumanining “Xo‘ja Abdujabbor” qishlog‘ida yashovchi fuqaro Hasan Naqshbandov hovlisida mazkur holat kuzatilgach, qo‘shnisi yomg‘irdan so‘ng yerning tutayotganini ko‘rib, holatni telefoniga tasvirga olgan va internetda tarqatgan.
“O‘sha kuni yomg‘ir yog‘gandi. Qo‘shnimiz yerning parlanayotganini ko‘rib, holatni telefoniga ‘syomka’ qilgan va interentda tarqatgan. Bu esa ijtimoiy tarmoqda vahimani keltirib chiqardi. Aslida hech narsa bo‘lgani yo‘q. Biz shu yerda yashayapmiz”, — deydi Hasan Naqshbandov.
Mazkur holatni o‘rgangan viloyat Favqulodda vaziyatlar boshqarmasi, viloyat Ekologiya boshqarmasi hamda Chiroqchi tuman hokimligi mas’ullari ham internetda tarqalgan vahimalar asossiz ekanini, qo‘rqishga asos yo‘qligini aytmoqda.
Holatni voqea joyiga borib o‘rgangan geolog Mahmadiyor Shodiqulovning aholi vakillariga tayanib, ma’lumot berishicha voqea joyi avval qamishzor, chakalakzor bo‘lgan.
“Keksa yoshli aholi vakillarining aytishicha, bu joy chakalakzor, qamishzor va daraxtzor bo‘lgan. Yillar davomida qamish va daraxtlar o‘sgan qurigan, yana o‘sgan va qurigan. Natijada uning joyida cho‘kindi hosil bo‘lgan. Geologiya tilida aytilganda torfga aylangan. Aholi bu joyda o‘sgan malinani yoqishi oqibatida yerga yaqin turgan torf yongan va shu holat yuzaga kelgan”, — deydi Mahmadiyor Shodiqulov.
Geologning aytishicha, torflarning yonishi davom etgan. Shu bois, mutaxassislar tutashni to‘xtatish maqsadida yerni kovlab, tutayotgan joyni tuproq bilan ko‘mgan va tutashning davom etishini to‘xtatgan.
“Mahalliy aholiga xavf tug‘dirmasligi uchun o‘rtani ekskovator bilan kovlab, yonishni, tutashni to‘xtatdik. Biz bu yerdan namunalar oldik, buni tekshirib ko‘rib, yakuniy xulosani aytamiz”, — deydi Mahmadiyor Shodiqulov.
Viloyat Favqulodda vaziyatlar boshqarmasi boshlig‘i o‘rinbosari Nodir Abdullayevning aytishicha, tutash sodir bo‘lgan joyda hech qanday ko‘mir, gaz yoki shunga o‘xshash qazilmalar yo‘q.
“Ijtimoiy tarmoqlarda vahima qilinganidek, bu yerda ko‘mir yoki gaz sizib chiqish holatlari yo‘q. Bu yerda faqat chirindi yonib, tutash hosil bo‘lgan. Vahimaga o‘rin yo‘q”, — deydi Nodir Abdullayev.
