Qonunchilik palatasi majlisini jonli efirga uzatishni ta’minlamagan mas’ullar ogohlantirildi
13-dekabr kuni bo‘lib o‘tgan Oliy Majlis Qonunchilik palatasining kengashida palata yalpi majlislarini to‘g‘ridan to‘g‘ri efirga uzatilishini ta’minlash masalasi ko‘rib chiqilgan. Bu haqda Oliy Majlis Qonunchilik palatasi spikerining o‘rinbosari Alisher Qodirov ma’lum qildi.
Alisher Qodirovning yozishicha, efirga uzatishni tashkil qilish uchun mas’ullar jamoatchilik e’tirozidan to‘g‘ri xulosa chiqarishi bo‘yicha ogohlantirilgan.
“Haftaning seshanba va chorshanba kunlari mas’ul qo‘mitalar tomonidan qonunlarni yalpi majlisga olib chiqishga tayyor ekanliklaridan kelib chiqib, Qonunchilik palatasining yalpi majlisi o‘tkazilishiga qaror qilindi”, — deydi u.
14-dekabr kuni soat 11:00 dan boshlab navbatdagi yalpi majlis “O‘zbekiston”, UzReport telekanallari hamda Qonunchilik palatasining Facebook’dagi sahifasi orqali jonli efirga uzatilmoqda. Kun tartibiga budjet, soliq ma’murchiligi va tashqi mehnat migratsiyasi bilan bog‘liq muhim qonun loyihalarining muhokamalari kiritilgan.
“Ma’lumot uchun, yalpi majlisda keskin tortishuvlar kam bo‘lishi, deputatlarning e’tiborsizligi yoki nofaol ekanligi emas, partiya fraksiya yig‘ilishlarini qizg‘in o‘tgani va deputatlar ko‘p savollariga javob olganini ko‘rsatadi”, — deb yozadi Qodirov.
Eslatib o‘tamiz, parlament quyi palatasining 10-dekabr kungi yalpi majlisi to‘g‘ridan to‘g‘ri efirga bor-yo‘g‘i 48 daqiqa ketgandi. Keyinroq Qonunchilik palatasi UzReport telekanali avvaldan rejalashtirilgan boks bo‘yicha O‘zbekiston chempionatini soat 11:00 dan boshlab efirga uzatish maqsadida Quyi palata majlisini efirga uzatishni to‘xtatganini ma’lum qilgandi.
