O‘zbekistonda Mahallabay ishlash va tadbirkorlikni rivojlantirish agentligi tashkil etiladi. Bu haqda prezidentning “Mahallada tadbirkorlikni rivojlantirish, aholi bandligini ta’minlash va kambag‘allikni qisqartirish bo‘yicha davlat siyosatining ustuvor yo‘nalishlari to‘g‘risida”gi qarorida so‘z boradi.
Qarorga ko‘ra, Tadbirkorlikni rivojlantirish agentligi hamda bosh vazirning Tadbirkorlar murojaatlarini ko‘rib chiqish qabulxonalari faoliyatini tashkil etish va muvofiqlashtirish kotibiyati negizida Iqtisodiy taraqqiyot va kambag‘allikni qisqartirish vazirligi huzuridagi Mahallabay ishlash va tadbirkorlikni rivojlantirish agentligi tashkil etiladi.
Shuningdek:
- Iqtisodiy taraqqiyot va kambag‘allikni qisqartirish vazirligi huzuridagi Tadbirkorlikni rivojlantirish agentligining Qoraqalpog‘iston Respublikasi, viloyatlar va Toshkent shahri bo‘yicha vakolatli ofislari hamda Qoraqalpog‘iston Respublikasi, viloyatlar va Toshkent shahridagi bosh vazirning Tadbirkorlar murojaatlarini ko‘rib chiqish qabulxonalari negizida mazkur agentlikning Qoraqalpog‘iston Respublikasi, viloyatlar va Toshkent shahridagi hududiy boshqarmalari;
- tumanlar va shaharlardagi bosh vazirning Tadbirkorlar murojaatlarini ko‘rib chiqish qabulxonalari negizida tuman (shahar) hokimliklari tarkibida yuridik shaxs tashkil etmagan holda Mahallabay ishlash va tadbirkorlikni rivojlantirish markazlari tashkil etiladi.
Markaziy bank, Bandlik va mehnat munosabatlari vazirligi, Investitsiyalar va tashqi savdo vazirligi, Moliya vazirligi, Davlat soliq qo‘mitasi, Savdo-sanoat palatasi rahbarlarining tegishli o‘rinbosarlari bir yil muddatga boshqa barcha vazifalarni bajarishdan ozod etilgan holda “Mahallabay ishlash shtabi”ga xizmat safariga yuboriladi.
Avvalroq prezident Shavkat Mirziyoyev bosh vazir qabulxonalari va Tadbirkorlikni rivojlantirish agentligi negizida Mahallabay ishlash va tadbirkorlikni rivojlantirish agentligi hamda tuman (shahar)larda Mahallabay ishlash va tadbirkorlikni rivojlantirish markazlari tashkil etilishini ma’lum qilgandi. Ushbu tizimni samarali yo‘lga qo‘yishga barcha hudud va sektor rahbarlari mas’ulligi aytilgan edi.
Mavzuga doir: Mahalla va oilani qo‘llab-quvvatlash vazirligi bir yillik faoliyati davomida qanday natijalarga erishdi?
Izoh (0)