AQSh Kongressining Vakillar palatasi kelgusi haftada Xitoyning Shinjon-Uyg‘ur avtonom hududidan tovarlar importini taqiqlashni nazarda tutuvchi qonun loyihasini ko‘rib chiqishni rejalashtirmoqda. Bu haqda hujjat mualliflaridan biri, demokrat-kongressmen Jim Makgovern jurnalistlarga ma’lum qildi.

Foto: AP Photo

“Keyingi hafta — inson huquqlari masalasi uchun muhim hafta. Biz Xitoy bilan bog‘liq qonunga ba’zi o‘zgartirishlar kiritish zarur deb hisoblaymiz. Umid qilamizki, uning katta qismi inson huquqlariga bag‘ishlanadi. Qonun loyihasi uyg‘urlar majburiy mehnatining oldini olishga qaratilgan, biz mazkur qonun loyihasi u yoki bu shaklda marra chizig‘ini kesib o‘tishini istaymiz”, — dedi Kongressning Inson huquqlari komissiyasi hamraisi Makgovern.

AQSh Pekinni Shinjondagi uyg‘ur aholisiga qarshi qatag‘on va genotsid uyushtirishda hamda avtonom hududda majburiy mehnatni qo‘llashda muntazam ayblab keladi. Xitoy esa bu ayblovlarni qat’iyan rad etadi.

Avvalroq AQSh, Kanada va Buyuk Britaniya Xitoyni “uyg‘urlar genotsidi”da ayblab, unga qarshi sanksiyalar kiritgan edi. Shuningdek, AQSh uyg‘urlarga qilinayotgan zug‘umlar sabab Shinjondan paxta importini cheklab qo‘ygan.

Xitoy AQSh va Kanadani Shinjon-Uyg‘ur avtonom hududi tufayli Xitoyga qarshi uyushtirgan “xato harakatlarini” tuzatishga va Xitoyning ichki ishlariga aralashishni bas qilishga chaqirgan.

Mart oyida Xitoyda H&M, Nike va yana bir nechta xalqaro korporatsiyalarining mahsulotlariga qarshi boykot boshlangan. Ta’kidlanishicha, ular Shinjon-Uyg‘ur avtonom hududidagi paxta dalalarida odamlarga qullardek munosabatda bo‘linayotgani haqidagi bayonotlar bilan mamlakat ichki siyosatiga aralashgani qayd etilgan.