Toshkent viloyatining Chinoz tumani hokimi Botir Alimbekov 12-noyabr kuni Chinoz tumanida 2022-yil uchun “Chinoz hayoti” ijtimoiy-siyosiy gazetasi obunasini uyushqoqlik bilan tashkil etish to‘g‘risida farmoyish imzoladi.
Farmoyishda Chinoz tumanida aholi, ayniqsa, rahbar va xodimlarning iqtisodiy, siyosiy va sog‘lom mafkuraviy axborotga bo‘lgan talabini qondirish zarurligi aytilgan. “Chinoz hayoti” gazetasiga obunani tashkil etish maqsadida hokimning birinchi o‘rinbosari boshchiligida ishchi guruh tashkil etilishi belgilangan. Uning tarkibida “Chinoz hayoti” gazetasi bosh muharriri, xalq ta’limi, moliya bo‘limi boshliqlari hamda tibbiyot birlashmasi rahbari ham bo‘lgan.
Ular 3 kun muddatda tumandagi barcha korxona, muassasa va tashkilot rahbarlari bilan maslahatlashib, 2022-yil uchun choralarini ko‘rishi lozimligi qayd etilgan. Tavsiya etilgan bir yillik obuna nusxasi soni 5498 tani tashkil etgan.
2-dekabr kuni Adliya vazirligi Chinoz tuman adliya bo‘limi gazetaga majburiy obuna noqonuniy deb topib, 15-noyabr kuni hokimlikka mazkur farmoyishni bekor qilish yuzasidan taqdimnoma kiritganini ma’lum qildi. Taqdimnomaga asosan mazkur farmoyish Chinoz tuman hokimining 30-noyabrdagi qarori bilan bekor qilingan.
Eslatib o‘tamiz, 22-iyunda mahalliy davlat hokimiyati organlari faoliyatiga “E-qaror” elektron tizimini joriy etish bo‘yicha hukumat qarori qabul qilingan. Mazkur hujjat mahalliy davlat hokimiyati organlarining qarorlari va farmoyishlari ishlab chiqilishdan to e’lon qilingungacha bo‘lgan barcha jarayonlarning faqat “E-qaror” elektron tizimi orqali amalga oshirilishini nazarda tutadi.
Izoh (0)