Rossiyaning Kemyerovo viloyatidagi “Listvyajnaya” ko‘mir konida yong‘in chiqdi. Uning oqibatida tarqalgan zaharli tutun 11 kishining hayotiga zomin bo‘ldi. Bu haqda Kemyerovo viloyati gubernatori Sergey Sivilyevga tayanib, “RBK” xabar berdi.
“Hozirda yana bir qurbon haqida ma’lum bo‘ldi. Halok bo‘lganlar soni 11 kishiga yetdi”, — deb yozgan gubernator Telegram-kanalida.
Sergey Sivilyevning so‘zlariga ko‘ra, shaxtada qolib ketgan konchilar ikkita uzoq masofadagi shtrekda (yer yuzasiga bevosita olib chiqadigan yo‘lagi yo‘q kon inshooti) bo‘lishi mumkin, ular bilan hozircha aloqa yo‘q.
Rossiya favqulodda vaziyatlar vaziri vazifasini bajaruvchi Aleksandr Chupriyanning “RBK”ga aytishicha, qutqaruvchilar barcha ishlarni amalga oshirish uchun tutunli hududda 7-8 km masofani bosib o‘tishi kerak. “Bu har tarafga tarvaqaylab ketgan tarmoq, hozirda 11 ta bo‘lim shu bilan shug‘ullanmoqda, afsuski, allaqachon jasadlar ham topildi”, — deya qo‘shimcha qildi u.
Sivilyevning qo‘shimcha qilishicha, avariyada jarohat olganlarning 43 nafari Konchilar salomatligini saqlash markaziga yotqizilgan. Ulardan to‘rt nafarining ahvoli og‘ir, dedi u. Favqulodda vaziyatlar vazirligi ma’lumotlariga ko‘ra esa jabrlanganlar soni 45 nafar.
Mintaqa rahbari viloyat hukumati barcha yordam dasturlarini tayyorlab qo‘yganini qo‘shimcha qildi. Konchilarning hammasi topilishi bilan ularning yaqinlariga xabar beriladi.
Viloyatning Belovskiy shahar okrugidagi “Listvyajnaya” konidagi yong‘in mahalliy vaqt bilan soat 08:51 da (Toshkent vaqti bilan 06:51) 250 metr chuqurlikda sodir bo‘lgan, hozirda shaxtadagi ishlar to‘xtatilgan.
Ko‘mir shaxtasida yong‘in chiqishi bo‘yicha viloyat Tergov boshqarmasi Jinoyat kodeksining 2-qismi, 217-moddasi (xavfli ishlab chiqarish obyektlaridagi sanoat xavfsizligi buzilishining inson o‘limiga olib kelishi) bo‘yicha jinoiy ish ochdi.
Hozirda qutqaruv ishlari olib borilmoqda, voqea joyida tergov guruhi ham ishlamoqda. FVV rahbari vazifasini bajaruvchi Aleksandr Chupriyan, hodisa joyiga uchib kelgan sog‘liqni saqlash vaziri Mixail Murashko kondagi avariya oqibatida jabrlanganlarga tibbiy yordam ko‘rsatishni nazoratga olgan.
Izoh (0)