Prezident Shavkat Mirziyoyev raisligida bo‘lib o‘tayotgan qishloq xo‘jaligi yerlarini ijaraga berish, meva-sabzavotchilik klasterlari hamda tomorqa xo‘jaliklari faoliyatini yanada rivojlantirish borasidagi ustuvor vazifalar mavzusidagi videoselektor yig‘ilishi avvalida davlat rahbari tuman hokimlari oldiga qo‘yiladigan vazifalar haqida gapirib o‘tdi.
“Yaqinda qabul qilingan qarorlar bilan paxta-to‘qimachilik va g‘alla klasterlari faoliyati bilan bog‘liq barcha masalalar yechib berildi.
Buning hisobidan, to‘qimachilik sanoati korxonalari eksporti 2021-yilda 3 milliard dollardan, kelgusi besh yilda esa 7 milliard dollardan oshiriladi. 2022-yilda oldimizda turgan paxta-to‘qimachilikning og‘ir masalalari yechimini topdik. To‘qimachilik sohasi qishloq xo‘jaligi yetakchisi bo‘lishi kerak. Albatta, 7 milliard so‘mga yetishimiz kerak”, — deydi Mirziyoyev.
Xuddi shunday ishlab, meva-sabzavotchilik eksportini bugungi kundagi 1,2 milliard dollardan kamida 5 milliard dollarga ko‘paytirish bo‘yicha barcha imkoniyatlar borligi qayd etildi.
“Uchta viloyatda yangi tayinlangan hokimlar shuni tushunishi kerak. Ko‘p tuman hokimlari prezident qarorini tushunmaydi. Hokimlar bilimi bo‘lsa ham, endi natija berishi kerak”, — dedi Mirziyoyev.
Yig‘ilishda oilaviy tadbirkorlik, tomorqa bo‘yicha ko‘p qarorlar qabul qilingani, lekin shunga qaramay, 25 ta tumanda eksport 1 million dollardan oshmagan bo‘lsa, meva-sabzavotga ixtisoslashgan 8 ta tumanda klasterlar tashkil etilmagani tanqid qilindi.
“Biz kelgusi yilda paxta va g‘alladan bo‘shagan 80 ming gektar yerlarni aholiga bo‘lib beryapmiz. Bundan tashqari, 70 ming gektar yerlar ‘oborot’ga qaytariladi. Aholining o‘zida ham 500 ming gektar atrofida tomorqa yerlari mavjud. Ushbu yerlardan qo‘shimcha 10 million tonna mahsulot olish, 1,5 million aholini band qilish va 800 million dollarlik eksport qilishga sharoit yaratilmoqda”, – deya ma’lum qildi davlat rahbari.
Bunda, meva-sabzavot klasterlari, dehqon xo‘jaliklari va tomorqani rivojlantirish, ularni moliyalashtirish, agroxizmatlar ko‘lamini kengaytirish bo‘yicha mutlaqo yangi tizim joriy etilishi bildirildi.
Bu borada Asaka, Angor, Denov, Jomboy, Samarqand, Oltiariq, Quva, Yuqori Chirchiq, Yangiqo‘rg‘on tumanlarida meva-sabzavotchilik klasterlari faoliyati to‘g‘ri yo‘lga qo‘yilib, ular 20-25 million dollardan mahsulot eksport qilayotgani aytildi.
Izoh (0)