AQShda majburiy emlashga qarshi harakat ramziga aylangan Illinoys shtatidagi o‘qituvchi Kadens Koyen bir necha oy oldin koronavirusga qarshi emlanganini tan oldi. Bu haqda Independent nashriga tayanib, “Komsomolskaya pravda” xabar qildi.
Ma’lum bo‘lishicha, shtatning Springfild shahridagi o‘rta maktabning matematika fani o‘qituvchisi Kadens Koyen COVID-19 ga qarshi majburiy emlanish va PZR testi topshirishdan bosh tortib, mashhurlikka erishgan. U rasmiylar talabiga bo‘ysunmaslik uchun to‘lovsiz ta’tilga chiqishga (ish haqi saqlanmagan holda) ham rozi bo‘lgan.
Shundan keyin u Illinoys va butun AQShda koronavirusga majburiy vaksinatsiyalashga qarshi “Mening tanam — mening tanlovim” shiori ostidagi harakat ramziga aylandi.
Yaqinda esa Koyen sheriklariga qattiq “zarba berib”, aslida yoz faslida vaksina qabul qilganini ma’lum qildi. U emlash sertifikatini maktab ma’muriyatiga yubordi va uning rasmini Facebook ijtimoiy tarmog‘idagi sahifasiga yukladi.
U o‘z harakatiga izoh berar ekan, hech qachon emlashning o‘ziga qarshi norozilik bildirmagani, aksincha, uning majburiy shakliga e’tiroz bildirishini aytgan. Ayol o‘z ish joyini yo‘qotish xavfi uni masalaga munosabatini qayta ko‘rib chiqishga majbur qilganini tan olgan.
“Men emlash sertifikatini ko‘rsatishni xohlamagandim, chunki bu maqsadga muvofiq emas. Lekin siz mening shaxsiy qarashlarim va o‘quvchilarimdan birini tanlashim kerakligini so‘rasangiz, o‘quvchilarimni tanlayman. Men hayotni o‘qituvchiliksiz tasavvur eta olmayman”, — degan u.
Eslatib o‘tamiz, AQShning Kaliforniya shtatida COVID-19 pandemiyasi davrida odamlarning emlanishiga qarshi kurashgan 34 yoshli bloger Stiven Garmon koronavirusdan vafot etgandi. Shuningdek, Portugaliyada emlanishga qarshi bo‘lgan oila koronavirus asoratlari oqibatida hayotdan ko‘z yumgan.