Kosonda transformator yonib ketdi (video)

Qashqadaryo viloyati Koson tumanida joylashgan transformatorda yong‘in chiqdi. Holat aks etgan video ijtimoiy tarmoqlarda tarqaldi.

FVV matbuot xizmati ma’lumotiga ko‘ra, tumanning “Pudina” MFY, Ziyoratgoh ko‘chasida joylashgan transformatorda yong‘in sodir bo‘layotgani to‘g‘risida xabar Favqulodda vaziyatlar bo‘limiga 9-noyabr kuni soat 18:34 da kelib tushgan.

Xabarga ko‘ra 1 ta yong‘in-qutqaruv ekipaji soat 18:49 da voqea joyiga yetib borgan. Transformator hududiy elektr tarmoqlari korxonasi mutaxassislari tomonidan elektr tarmog‘idan uzilgandan so‘ng yong‘in soat 19:22 da to‘liq bartaraf etilgan.

Qayd etilishicha, hodisa oqibatida halok bo‘lgan va jabrlanganlar yo‘q. Hozirda yong‘in sababi va keltirilgan zarar miqdori aniqlanmoqda.