Муборак тумани ҳокими Акром Арипов ўзи ва тумандаги сектор раҳбарлари бир ойлик маошини етим болаларга ҳадя қилмоқчилигини маълум қилди. Бу ҳақда туман ҳокими билан бўлган матбуот анжуманида маълум қилинди, дея хабар берди «Дарё» мухбири.
Қайд этилишича, вилоятда фаолият юритувчи журналист ва блогерлар учун Муборак туманида ташкил этилган пресс-тур давомида бўлиб ўтган матбуот анжуманида сўз олган ҳоким Акром Арипов туманда 7 нафар етим фуқароларга бепул уй-жойлар топширилганини, шунингдек,ҳоким бошчилигидаги сектор раҳбарлари бир ойлик маошини уларга ҳадя қилмоқчилигини маълум қилган.
«Етти нафар ота-она қарамоғидан маҳрум бўлган фуқароларни уй-жой билан таъминладик. Шунингдек, кўплаб тадбиркорлар таклифини инобатга олиб, шахсан ўзим ва сектор раҳбарлари намуна сифатида тадбиркорларга қўшилиб, бир ойлик маошимизни айнан шу фуқароларга ёрдам тариқасида ҳадя қилмоқчимиз. Бу ҳақда Халқ депутатлари туман Кенгаши депутатларига таклиф киритяпмиз», — дейди Акром Арипов.
«Дарё» мухбирининг айрим манбаларга таяниб ёзишича, туман ҳокимлари 8-10 миллион атрофида маош олса, сектор раҳбарлари — туман прокурори, ИИБ бошлиғи ва туман солиқ инспекцияси раҳбари 7-8 миллион сўм атрофида маош олади.
Эслатиб ўтамиз, аввалроқ Ғузор тумани ҳокими Бекзод Суюнов ҳоким сифатидаги биринчи маошини, шунингдек, сектор раҳбари сифатидаги 5 миллион сўм пул мукофотини ҳам уйсиз аёлга ҳадя қилгани хабар берилганди.
Изоҳ (0)