“Titanik” va “Xalk”dagi rollarni qo‘ldan boy bergan, mashhurligi onasi bilan munosabatlariga putur yetkazgan Mettyu Makkonaxining qiyinchiliklarga to‘la hayot qissasi

Aksariyat muxlislari e’tirof etganidek, aktyor Mettyu Makkonaxi haqiqatan ham orzularga beriluvchan odam. “Esankirash”, “Vaqt o‘ldiradi”, “Amistad”, “Tentak” va “Dallaslik xaridorlar klubi” kabi filmlari bilan tanilgan Makkonaxi ko‘p qirrali aktyor bo‘lib, karyerasi unga ko‘plab rollarni sinab ko‘rish imkonini bergan. To‘g‘rirog‘i, Makkonaxi dastlab unchalik jiddiy bo‘lmagan rollarda tajriba o‘tkazdi, lekin yillar davomida u aktyor sifatida rivojlanib, “Dallaslik xaridorlar klubi” filmidagi OITSga chalingan odam roli kabi murakkabroq rollarni ham ijro etishning uddasidan chiqdi.

Aktyor filmdagi personajiga ko‘proq o‘xshashi uchun qattiq harakat qildi, roli uchun 47 kilogrammga ozdi. Uning sa’y-harakatlari, mehnati e’tiborsiz qolmadi. 2014-yilda u “Oskar”ga va “Eng yaxshi aktyor” nominatsiyasida “Oltin globus” mukofotiga loyiq ko‘rildi, bu esa romantik komediyalardan voz kechib, aktyorlik iste’dodi bilan ajralib turish orqali o‘z imijini o‘zgartirishga uringan kishi uchun katta yutuqdir. Mettyu Makkonaxi bolaligida ko‘plab fojiali voqealarni boshdan kechirdi. U mashhurlikka erishgach ham ishonish qiyin bo‘lgan voqealarga duch keldi.

Mettyu Makkonaxi bolaligida zo‘ravonlik qurboni bo‘lgan

Mettyu Makkonaxi 1969-yil 4-noyabrda Texasda tug‘ilgan. O‘quvchilik vaqtidayoq u mashhur edi, hatto “Eng chiroyli o‘quvchi” mukofotiga ham sazovor bo‘lgan. Biroq oilasidagi holat havas qilarlik darajada emasdi. Keyinchalik u bolaligida ota-onasi tomonidan ayovsiz kaltaklanganini, garchi boshqalar bu kabi harakatlarni zo‘ravonlik sifatida qabul qilgan bo‘lsa ham, lekin u hech qachon ota-onasini zo‘ravon deb hisoblamagani haqida so‘zlab bergan.

O‘sha paytda men chindan ham qo‘rqqanman. Lekin o‘shanda ham, undan keyin ham oyim va dadamning bir-birlariga yoki ularning bizga bo‘lgan muhabbatiga hech qachon shubha qilmaganman.

Uning qo‘shimcha qilishicha, qachonki o‘zi ota bo‘lsa, farzandlarining tarbiyasiga bo‘lgan yondashuvi ota-onasinikidan farq qiladi, lekin u hali ham ularni shafqatsiz deb hisoblamaydi: kaltaklanganida bunga loyiq ish qilganini va o‘zida bo‘lmaganini ta’kidlaydi. Shuningdek, u bolalari bilan muloqot qilishga alohida e’tibor berishini aytadi, chunki bolaligida onasi ona-bola o‘rtasidagi muloqotni bema’nilik deb hisoblagan.

Mettyu Makkonaxi chet elda juda qiyin ahvolda qolgan

 

Mettyu Makkonaxi o‘zining “Yashil yog‘du” (Greenlights) nomli memuar asarida o‘rta maktabni bitirgach, Avstraliya almashinuv dasturida qatnashishga qaror qilganida unga oson bo‘lmaganini ham ta’kidlaydi. Hamma narsa u kutganidek bo‘lib chiqmadi va u qiyinchilikni yengib o‘tish yo‘lini topishi kerak edi.

Men olis Avstraliyada juda g‘alati oilalarning birida yashadim, chiroyli plyajlar va Elle Makferson haqidagi tasavvurlarim sarob bo‘lib chiqdi.

Uning qo‘shimcha qilishicha, Avstraliyada uning hayoti go‘yoki to‘xtab qolgandek edi. Uning na do‘stlari, na bir tayinli ishi bor edi. Hatto yaqinlari bilan gaplashishi uchun telefoni ham bo‘lmagan, shu bois ham faqat o‘zigagina tayanishi kerak edi.

Agar Avstraliyada bir amallab o‘tkazgan o‘sha qiyin davrim bo‘lmaganida, hozirgi hayotim ham bo‘lmasdi.

Mettyu Makkonaxi karyerasining ilk yillarida turli muammolarga duch kelgan

Aktyor hozir juda mashhur, lekin har doim ham shunday bo‘lavermagan. Mettyu kino sanoatiga qadam qo‘yganida juda ko‘p qiyinchiliklarga duch keldi. Entertainment Weekly xabariga ko‘ra, Makkonaxi birinchi marta kino maktabida o‘qiyotganda juda ko‘plab rad etishlardan tushkunlikka tushib, model sifatida o‘zini sinab ko‘rmoqchi bo‘lgan. Iste’dodlilarni izlab yuruvchi agent uning “chiroyli qo‘llari” borligini aytadi. Shuningdek, unga agar karyerasini davom ettirish niyati bo‘lsa, qo‘llarini parvarishlashni va tirnoqlarini tishlashni bas qilishni tavsiya qilgan.

Bundan tashqari, Makkonaxi ko‘proq pul ishlash uchun Catfish Station nomli barda xizmat ko‘rsatish xodimi sifatida ishga kiradi. Aktyor u yerni “baliq va pivo sotiladigan, doimo ter hidi anqib turadigan bar” deb ataydi va u barda xizmat qiluvchi yagona oq tanli odam bo‘lgani uchun boshqalardan ajralib turganini esga oladi. Makkonaxi bar egasi bilan yaxshi munosabatda bo‘lgan va hali ham yaxshi do‘st ekanligidan mamnun.

Makkonaxi uzoq yillar davomida onasi bilan gaplashmagan

Keyingi yillardagi shuhrat Mettyu Makkonaxi va uning onasi Kay bilan davom etgan munosabatlari uchun jiddiy salbiy holatga aylandi. People nashriga ko‘ra, shou-biznes aktyor hayotini qamrab olganidan so‘ng, onasi o‘g‘lining yangi shon-shuhratidan esankirab qoldi. Aktyorning tushuntirishicha, u mashhur bo‘lganidan keyin onasi bilan bo‘ladigan har doimgi suhbatlari ham avvalgidek samimiy bo‘lmagan.

Qo‘ng‘iroqlarimga onam emas, mashhurligimdan esankirab qolgan muxlisim javob berardi.

Vaziyat kundan kunga yomonlashib borar, aktyor yillar davomida kutilgan bunday mashhurlikka ko‘nikish yo‘lini qidirar edi.

Men shon-shuhrat va boshqa narsalar o‘rtasidagi muvozanatni topishga harakat qilardim. Onam bilan ko‘p narsalarni baham ko‘rardim ... men baham ko‘rgan narsalarim uch kundan keyin olti soatlik yangiliklarda paydo bo‘lardi.

Shu tufayli ona-bola o‘rtasida tez-tez kelishmovchiliklar yuzaga kela boshladi, natijada Makkonaxi onasidan uzoqlashishga qaror qildi. Aniqrog‘i, sakkiz yilga. Oxir-oqibat ular yarashishdi va yana muloqot qilishni boshladilar, lekin aktyorga hammasini o‘ylab olish uchun uzoq vaqt kerak bo‘ldi.

Hech narsa Mettyu Makkonaxini baxtli qilolmagan

Mettyu Makkonaxi sezilarli muvaffaqiyatlarga erishganiga qaramay, bundan ham ko‘prog‘iga loyiq ekanini his qilardi. The Guardian 2018-yilda ta’kidlaganidek, aktyor uning orzulari haqiqatning o‘zidan yaxshiroq ekanligiga ishongan.

Men hali ham o‘zim tasavvur qilganimdek filmda suratga tushmaganman.

Shubhasiz, Makkonaxi o‘ziga nisbatan qattiqqo‘l bo‘lishni yomon deb hisoblamaydi

Shuningdek, u o‘ziga yoqadigan va hurmat qiladigan ko‘plab filmlarda ishtirok etganini aytadi. Bundan tashqari, u o‘zi ijro etgan rollarning muxlisi ekanini va obrazni qoyillatib o‘ynaganini tan oladi ham. U bir kunmas bir kun o‘zi orzu qilgandek filmda rol ijro etishiga umid qiladi.

Mettyu Makkonaxi kutilmagan janjallarga aralashib qolgan

Mettyu Makkonaxi ba’zida bahsli mojarolarga ham aralashib qoladi. Misol uchun, eng shov-shuvli voqealaridan biri 1999-yilda aktyorning hibsga olinishi edi. Makkonaxi shov-shuvli voqea haqida o‘zining “Yashil yog‘du” memuar asarida batafsil yozgan, deb yozadi The Hollywood Reporter. Yalang‘och aktyor yarim tunda uyining derazalarini ochib, “birozgina chekkan holda Anri Dikonguening go‘zal afrikancha ritmlarini tinglashni” xohlab qoladi.

Bu holat Ostin politsiyasiga yoqmaydi va uning uyiga bostirib kirib, qo‘liga kishan solishadi va “tinchlikni buzgani, marixuana saqlagani va hibsga olishda qarshilik ko‘rsatgani” uchun qamoqqa olishadi. Aktyor norozi bo‘lib, ularga baqiradi va kiyim kiyishdan bosh tortadi. Makkonaxining so‘zlariga ko‘ra, shu yo‘l bilan u politsiya uning uyiga kirishgani xato ekanligini va o‘z ishi bilan shug‘ullanayotganini ko‘rsatmoqchi bo‘lgan.

Keyinchalik aktyor 50 dollar jarima va qo‘shimcha mashhurlik bilan qutulib qoldi.

Mettyu Makkonaxi o‘z stereotiplariga ega shaxs

Mettyu Makkonaxi 2000-yillarning boshlarida ijodiy ta’til olishi yoki “Makkonaxining uyg‘onishi” hammani hayratda qoldirdi. U 20 oy davomida ommadan uzoqlashdi, chunki aynan shu davrlarda u faqat romantik komediyalarda o‘ynagan va bundan juda charchagan edi.

Shunday davr bo‘ldiki, men romantik komediyalardagina bo‘ladigan yigit rolidan boshqa obrazda ko‘rinmadim, men plyajda ko‘ylaksiz yuradigan yigit edim. Bu normal holat edi. O‘shanda ham aytganman, hozir ham aytaman, men ijro etgan ko‘ylaksiz yigit roli uchun ham, plyajdagi hashamatlar uchun ham yaxshigina pul to‘langan.

Aktyorga turli xil rollarda o‘zini sinash imkoniyati berilmadi va u o‘z vaziyati bo‘yicha nimadir qilishga qaror qildi. U hatto romantik komediyalarda suratga tushishni istamagani uchun unga 14,5 million dollar olib kelishi mumkin bo‘lgan rolni rad etdi. Ushbu ta’til aktyorga o‘z imijini qayta shakllantirishga yordam berdi. Uning sa’y-harakatlari muvaffaqiyat bilan yakunlandi, chunki unga tez orada yangi va xilma-xil rollarga nomzod sifatida qaray boshlashdi.

Mettyu Makkonaxi “Titanik” va “Xalk” filmlarida rol o‘ynashni juda xohlagan

Mettyu Makkonaxi iste’dodli aktyor bo‘lsa ham, u har doim ham o‘zi xohlagan rollarni ololmagan – bu uning karyerasiga katta yordam berishi mumkin bo‘lgan imkoniyatlar edi. Misol uchun, Today nashri ma'lumotlariga ko‘ra, Makkonaxi “Titanik” filmidagi rol uchun ko‘rib chiqilgan aktyorlardan biri bo‘lib, mazkur rol oxir-oqibat Leonardo Di Kaprioga nasib etdi. Keyt Uinslet chindan ham Makkonaxi bilan kinosinovdan o‘tganini ham aytgan.

Men Mettyu bilan kinosinov topshirganman, bu haqda ilgari hech qachon omma oldida gapirmaganman. Mettyu bilan juftlik rolini ijro etdik: bu juda ajoyib edi. Bu shunchaki Jek va Rouz, Keyt va Leo emas edi.

Bu hali hammasi emas. Aktyor Xalk rolini o‘ynashni ham xohlagan, ammo orzusini amalga oshira olmadi. Huffington Post xabariga ko‘ra, u Marvel qahramonlari olamiga qiziqish bildirganida rad etilgan. Undan bu rolga qiziqish bildirganmi, degan savolga, u ha deb javob bergan, lekin rad etishganini qo‘shimcha qilgan. Esingizda bo‘lsa, Edvard Norton 2008-yilda suratga olingan “G‘aroyib Xalk” filmida Xalk rolini o‘ynagan, Mark Ruffalo esa Marvel kino olamidagi boshqa Xalk filmlarining qahramoniga aylangan.

Otasidan ayrilish u uchun haqiqiy fojia bo‘lgan

Mettyu Makkonaxi 1992-yilda otasi Jeyms Donald Makkonaxidan ayrilganini bilganida katta zarba oldi. Tim Ferriss bilan suhbatda u bu ayriliq haqida gapiraturib otasidan ayrilishi uni o‘z ishiga nisbatan tavakkal qilishga ko‘proq undagani haqida aytib o‘tgan.

Otam mening suyanchim edi, chunki u tirik edi.U men uchun hukumatdan va qonundan yuqori bo‘lgan. Endi u yo‘q... Men suyanishim mumkin bo‘lgan odam yo‘q endi.

Otasining vafoti aktyorni o‘lim haqida ko‘proq o‘ylashga majbur qildi. U aktyorlik va mashhurlik kabi sevgan va orzu qilgan narsalar vaqtinchalik ekanligini, qaysidir ma’noda qo‘rquvdan dovdirab qolishdan ko‘ra ko‘proq tavakkal qilishga va o‘zgarishlarni qabul qilishga imkon berishini tushunib yetdi.

Bundan tashqari, Vanity Fair’ning yozishicha, Makkonaxining ota-onasi notinch munosabatlarga ega edi, ular birgalikdagi turmushi davomida ko‘p marta yarashishgan va ajralishgan. Ammo yakunda ular doimo bir-birlariga qaytib kelishardi. Onasidan o‘limi haqida eshitganida aktyor o‘z holatini shunday tasvirlaydi:

Tizzam bukilib-bukilib ketdi. Ishonmadim. U mening otam edi. Uni hech kim va hech narsa o‘ldira olmaydi, deb ishonardim.

Omadsizlikka uchragan film uchun aktyor o‘z tanasini stressga duchor qilgan

Mettyu Makkonaxi a’lo darajada uddalashi mumkin bo‘lgan narsa bu — rolga tayyorgarlik ko‘rish va u qo‘lidan kelganini qilishiga ishonch hosil qilish uchun bor imkoniyatini ishga solishdir. Misol uchun, 2016-yilgi “Oltin” filmidagi roli ustida ishlayotgan aktyor 45 kilogramm vazn yig‘ib, kuchli og‘riqni boshdan kechirdi. U biznesmen Kenni Uells obraziga mos bo‘lishi uchun shunday qilishiga to‘g‘ri keldi.

Afsuski, film katta omadsizlikka uchradi, aktyorning barcha sa’y-harakatlari zoye ketdi. Shundan so‘ng tanasidagi ortiqcha yog‘larni yo‘qotish uchun unga ko‘p oylik intensiv mashg‘ulotlar kerak bo‘ldi. Makkonaxi 2019-yilda ham o‘sha ortiqcha vaznni yo‘qotishga harakat qilayotganini aytgan.

Oradan ancha vaqt o‘tdi. Men avvalgi formamga kelishim kerak, hozir faqatgina shuni xohlayman. Men “Oltin” filmida 220 funt vazn yig‘dim, lekin hali ham undan to‘la qutula olmadim.

Filmdagi roli uchun aktyor sochini kalga ham oldirgan, deb yozadi The Guardian. Film muvaffaqiyat qozonolmadi, aktyor hech qanday mukofot olmadi. Biroq u 2013-yilda suratga olingan “Dallaslik xaridorlar klubi” filmidagi ijrosi bilan tomoshabinlarni hayratda qoldirdi, buning uchun u 50 kilogrammga yaqin vazn tashladi.

Mettyu Makkonaxi prokat filmlarda unchalik muvaffaqiyatli qozonmadi

Mettyu Makkonaxi hech qachon buning uddasidan chiqa olmadi. Rollari uchun bir nechta mukofotlarga, jumladan, “Oskar” olganiga qaramay, u kassabop filmlarda muvaffaqiyatga erisha olmadi. Aktyor “Intersteller”, “Oq tanli yigit Rik”, “Gunoh daryosi”, “Jentelmenlar” va boshqalar kabi ko‘plab ajoyib filmlarda rol o‘ynagan, ammo tijorat xitlarini yarata olmasligini tushunib yetgan.

U o‘zining “Yashil yog‘du” kitobida “kassabop filmlarda juda kam muvaffaqiyatga erishganini” yozgan. “Muammo mendami? Mavzudami? Filmlardami? Bilmayman”, — degan u.

Bunday filmlardagi omadsziliklar mening aktyorlikka bo‘lgan muhabbatimni susaytirmadi, aksincha kasbimga yanada ko‘proq qiziqtirdi... Endi men karyeramda shunchaki artist emas, balki ham aktyor, ham rassom edim. Va bu menga huzur bag‘ishlardi. Mening karyeram mazmunan boy bo‘ldi.

2017-yilda Guardian’da chiqqan maqolada Makkonaxining karyerasida susayish kuzatilgani va aktyorga yana bir martaba tanaffusga muhtoj ekanligi aytilgan.

Aktyor so‘nggi yillarda bir nechta omadsiz filmlarda suratga tushdi, buning natijasida The Guardian jurnalisti Noa Gittell 2016-yil aktyor uchun haqiqatan ham dahshatli yil bo‘lganini, u suratga tushgan “Jons okrugining ozod odamlari” filmi taassurot qoldira olmagani, ustiga ustak budjetning yarmini ham topa olmagani haqida taxmin qilishiga sabab bo‘ldi. Yana bir film – “Xudkushlar o‘rmoni” ham Kann festivalida tomoshabinlar tomonidan hurmatsizlarcha hushtakbozlik bilan kutib olindi.