Oliy Majlis Qonunchilik palatasi deputati Doniyor G‘aniyev ikkilamchi bozordagi avtomobillar oldi-sotdisidagi bojlarni pasaytirishni so‘rab deputatlik so‘rovi yuborgani to‘g‘risida xabar berilgandi. Deputatning ma’lum qilishicha, mazkur so‘rovga Moliya vazirligidan javob kelgan.
So‘rov javobida aytilishicha, so‘rovda ko‘tarilgan muammolarni inobatga olgan holda, Moliya vazirligi tomonidan 2022-yil budjet parametrlarini shakllantirishda avtotransport vositalarini sotib olganlik uchun undiriladigan yig‘imlarni bekor qilish ko‘zda tutilmoqda. “Bu esa sotib olingan avtotransport vositasini DYHXXda ro‘yxatdan o‘tkazish uchun transport vositasining ot kuchi va ishlab chiqarilgan sanasidan kelib chiqqan holda fuqarodan undiriladigan bir necha million so‘mlik to‘lov bekor bo‘lishini anglatadi”, — deb yozadi G‘aniyev.
Bundan tashqari, javob xatida Moliya va Adliya vazirliklari tomonidan avtomobil oldi-sotdi shartnomasini notarial rasmiylashtirish uchun belgilangan davlat boji miqdorlari ham qayta ko‘rib chiqilgani hamda ularni pasaytirish yuzasidan “Davlat boji to‘g‘risida”gi qonunga o‘zgartirish kiritish yuzasidan qonun loyihasi ishlab chiqilayotgani ma’lum qilingan.
“Ko‘rinib turibdiki, qonunchilikka yuqoridagi o‘zgarishlarni kiritish orqali 2022-yildan ikkilamchi bozordan sotib olingan avtomobilni rasmiylashtirish xarajatlarini keskin kamaytirish va fuqarolarga yengillik yaratish ko‘zda tutilmoqda. Kechagi saylov natijalari ortidan bu yaxshi xabardan anglash mumkinki, prezidentlik saylovida g‘alaba qozongan Shavkat Mirziyoyevning ikkinchi prezidentlik davrida ham fuqarolarga qulaylik yaratish, ularni rozi qilish davlat siyosatining ustuvor yo‘nalishi sifatida davom etadi”, — deya ta’kidlaydi u.
Avvalroq Shavkat Mirziyoyev Toshkentda transport muammolari qanday hal etilishini aytgani, Farg‘onada dastlabki elektromobillar 2021-yil dekabr oyida test rejimida ishlab chiqarilishi, UzAuto Motors yarimo‘tkazgichlar tanqisligi sabab xaridorlarga o‘rindiq isitish modulisiz arzonroq Cobalt taklif qilayotgani to‘g‘risida xabar berilgandi.
Izoh (0)