Олий Мажлис Қонунчилик палатаси депутати Дониёр Ғаниев иккиламчи бозордаги автомобиллар олди-сотдисидаги божларни пасайтиришни сўраб депутатлик сўрови юборгани тўғрисида хабар берилганди. Депутатнинг маълум қилишича, мазкур сўровга Молия вазирлигидан жавоб келган.
Сўров жавобида айтилишича, сўровда кўтарилган муаммоларни инобатга олган ҳолда, Молия вазирлиги томонидан 2022 йил бюджет параметрларини шакллантиришда автотранспорт воситаларини сотиб олганлик учун ундириладиган йиғимларни бекор қилиш кўзда тутилмоқда. «Бу эса сотиб олинган автотранспорт воситасини ДЙҲХХда рўйхатдан ўтказиш учун транспорт воситасининг от кучи ва ишлаб чиқарилган санасидан келиб чиққан ҳолда фуқародан ундириладиган бир неча миллион сўмлик тўлов бекор бўлишини англатади», — деб ёзади Ғаниев.
Бундан ташқари, жавоб хатида Молия ва Адлия вазирликлари томонидан автомобиль олди-сотди шартномасини нотариал расмийлаштириш учун белгиланган давлат божи миқдорлари ҳам қайта кўриб чиқилгани ҳамда уларни пасайтириш юзасидан «Давлат божи тўғрисида»ги қонунга ўзгартириш киритиш юзасидан қонун лойиҳаси ишлаб чиқилаётгани маълум қилинган.
«Кўриниб турибдики, қонунчиликка юқоридаги ўзгаришларни киритиш орқали 2022 йилдан иккиламчи бозордан сотиб олинган автомобилни расмийлаштириш харажатларини кескин камайтириш ва фуқароларга енгиллик яратиш кўзда тутилмоқда. Кечаги сайлов натижалари ортидан бу яхши хабардан англаш мумкинки, президентлик сайловида ғалаба қозонган Шавкат Мирзиёевнинг иккинчи президентлик даврида ҳам фуқароларга қулайлик яратиш, уларни рози қилиш давлат сиёсатининг устувор йўналиши сифатида давом этади», — дея таъкидлайди у.
Аввалроқ Шавкат Мирзиёев Тошкентда транспорт муаммолари қандай ҳал этилишини айтгани, Фарғонада дастлабки электромобиллар 2021 йил декабрь ойида тест режимида ишлаб чиқарилиши, UzAuto Motors яримўтказгичлар танқислиги сабаб харидорларга ўриндиқ иситиш модулисиз арзонроқ Cobalt таклиф қилаётгани тўғрисида хабар берилганди.
Изоҳ (0)