O‘zbekistonda tashkil etilgan saylov uchastkalaridagi saylovchilar ro‘yxatiga jami 19 million 859 ming 127 nafar saylovchi kiritilgan bo‘lib (shulardan 9 million 459 ming 273 nafari yoki 48 foizi erkaklar, 10 million 399 ming 854 nafari yoki 52 foizi ayollar, 6 million 458 ming 283 nafari 30 yoshgacha bo‘lgan yoshlar), ularning 887 ming 686 nafari saylovda birinchi marta ovoz beradi. Saylov uchastkalarida birinchi marta ovoz berayotgan yosh saylovchilarga turli sovg‘alar ulashilmoqda.
Xorijiy davlatlarda tuzilgan 54 ta saylov uchastkasidagi saylovchilar ro‘yxatiga jami 299 ming 780 nafar saylovchi kiritilgan. Toshkent vaqti bilan 24-oktabr kuni soat 4:00 da Tokio, Seul shaharlarida tashkil etilgan saylov uchastkalari ochilgan. Xorijdagi saylov uchastkalarining eng so‘nggisi AQShning Nyu-York shahrida ochiladi va saylov aynan AQShdagi uchastka Toshkent vaqti bilan 25-oktabr kuni soat 6:00 da yopilgach, yakunlanadi.
Saylov kuni o‘z yashash joyida bo‘lish imkoniyatiga ega bo‘lmagan saylovchilar uchun muddatidan oldin ovoz berish sharoiti yaratilgan edi. 14—20-oktabr kunlari O‘zbekiston va xorijda tashkil etilgan saylov uchastkalarida 421 618 nafar fuqaro muddatidan oldin ovoz berishda ishtirok etdi (301 094 kishi O‘zbekistonda ovoz bergan bo‘lsa, 120 524 nafar saylovchi xorijdan ovoz berdi).
Quyida Toshkent shahridagi 83-maktabda tashkil etilgan 116-saylov uchastkasidan ovoz berish jarayoni boshlanishi oldidan tayyorlangan fotoreportaj bilan tanishish mumkin (to‘ldirish: O‘zbekiston prezidentligiga nomzodlardan biri — “Milliy tiklanish” partiyasi yetakchisi Alisher Qodirov aynan shu saylov uchastkasida ovoz berdi).
Izoh (0)