Давоми: Ўзбекистон президенти сайлови уч соатда «ўтган» мақомига эга бўлди. Барча номзодлар овоз бериб бўлди
Ўзбекистонда ташкил этилган сайлов участкаларидаги сайловчилар рўйхатига жами 19 миллион 859 минг 127 нафар сайловчи киритилган бўлиб (шулардан 9 миллион 459 минг 273 нафари ёки 48 фоизи эркаклар, 10 миллион 399 минг 854 нафари ёки 52 фоизи аёллар, 6 миллион 458 минг 283 нафари 30 ёшгача бўлган ёшлар), уларнинг 887 минг 686 нафари сайловда биринчи марта овоз беради. Сайлов участкаларида биринчи марта овоз бераётган ёш сайловчиларга турли совғалар улашилмоқда.
Хорижий давлатларда тузилган 54 та сайлов участкасидаги сайловчилар рўйхатига жами 299 минг 780 нафар сайловчи киритилган. Тошкент вақти билан 24 октябрь куни соат 4:00 да Токио, Сеул шаҳарларида ташкил этилган сайлов участкалари очилган. Хориждаги сайлов участкаларининг энг сўнггиси АҚШнинг Нью-Йорк шаҳрида очилади ва сайлов айнан АҚШдаги участка Тошкент вақти билан 25 октябрь куни соат 6:00 да ёпилгач, якунланади.
Сайлов куни ўз яшаш жойида бўлиш имкониятига эга бўлмаган сайловчилар учун муддатидан олдин овоз бериш шароити яратилган эди. 14—20 октябрь кунлари Ўзбекистон ва хорижда ташкил этилган сайлов участкаларида 421 618 нафар фуқаро муддатидан олдин овоз беришда иштирок этди (301 094 киши Ўзбекистонда овоз берган бўлса, 120 524 нафар сайловчи хориждан овоз берди).
Қуйида Тошкент шаҳридаги 83-мактабда ташкил этилган 116-сайлов участкасидан овоз бериш жараёни бошланиши олдидан тайёрланган фоторепортаж билан танишиш мумкин (тўлдириш: Ўзбекистон президентлигига номзодлардан бири — «Миллий тикланиш» партияси етакчиси Алишер Қодиров айнан шу сайлов участкасида овоз берди).
Изоҳ (0)