Oliy Majlis Senatning XX yalpi majlisida avtomobil yo‘llari hamda sun’iy inshootlarning holati va transport vositalarining xavfsiz harakatlanishini ta’minlashga doir qonun hujjatlarining ijro etilishi yuzasidan Vazirlar Mahkamasiga yuborilgan parlament so‘rovi natijalari muhokama qilindi, deb xabar beradi parlament yuqori palatasi matbuot xizmati.

Foto: Senat matbuot xizmati

Ma’lum qilinishicha, ko‘prik va yo‘l o‘tkazgichlar texnik holatini yaxshilashga qaratilgan hukumat qarori, O‘zbekistonning 2030-yilgacha avtomobil yo‘llarini rivojlantirish strategiyasi loyihasi tayyorlangan. Shuningdek, tegishli hujjat asosida “O‘zyo‘linspeksiyasi”ga tadbirkorlik subyektlari tomonidan yo‘l-qurilish ishlari olib borilayotgan obyektlarda sifat nazoratini operativ o‘tkazish hamda sodir etilayotgan qoidabuzarliklarni o‘z vaqtida aniqlash vakolati berilgan.

Biroq parlament so‘rovida ko‘tarilgan ayrim masalalar yuzasidan asosli javoblar taqdim etilmagan.

Xususan, Vazirlar Mahkamasining 2006-yil 1-noyabrdagi 226-sonli qaroriga ilova qilingan “Avtomobil yo‘llarini ta’mirlash va saqlash ishlari tasnifi”da avtomobil yo‘lini joriy ta’mirlash ishlari bajarilganidan so‘ng uning xizmat qilish muddatiga nisbatan talab belgilanmagani va bu hol jiddiy muammolarga sabab bo‘layotgani e’tiborsiz qoldirilgan.

Bundan tashqari, tegishli obyektlarda pudratchi tomonidan bajarilayotgan qurilish-montaj ishlari sifatini aniqlash bo‘yicha sinov laboratoriyasi aynan pudratchining o‘zi tomonidan jalb qilinayotgani korrupsiyaviy holatlarga sabab bo‘layotgani bilan bog‘liq masala yechimi yuzasidan ham aniq javob taqdim etilmagan.

Javobni muhokama qilish jarayonida mazkur so‘rovda ko‘tarilmagan boshqa dolzarb masalalar ham mavjudligi aniqlangan.

Xususan, avtomobil yo‘llarida harakat xavfsizligini ta’minlashga qaratilgan tadbirlar yetarli darajada moliyalashtirilmayapti. 2021-yilda ushbu maqsadlar uchun yo‘naltirilgan mablag‘ mavjud ehtiyojning bor-yo‘g‘i 27 foizni (dastlabki hisob-kitoblarga ko‘ra 2,9 trillion so‘m zarur bo‘lsa-da, 781,8 milliard so‘m ajratilgan) tashkil qiladi.

“Bu esa ta’mirlash o‘rtasidagi muddatlarning yildan yilga ortishi, qo‘shimcha sarf-xarajatlar talab etilishiga sabab bo‘lmoqda”, — deyiladi xabarda.

Foto: Senat matbuot xizmati

Bundan tashqari, sohada korrupsiya bilan bog‘liq qonun buzilishlariga to‘liq barham berilmayotgani qayd etilgan.

Ma’lumotlarga qaraganda, 2019-2020-yillar va 2021-yilning birinchi yarmida transport sohasidagi korxona va tashkilotlarning 375 nafar xodimi jinoiy javobgarlikka tortilgan va ularning 358 nafari yoki 95 foizi korrupsiyaviy jinoyatlar sodir etgan.

Mudofaa va xavfsizlik masalalari qo‘mitasi raisi Qutbiddin Burhonovning ta’kidlashicha, “avtomobil yo‘llariga mas’ul bo‘lgan Avtomobil yo‘llari qo‘mitasi tizimidagi 149 nafar xodimning jinoyat sodir etgani tashvishli hol”.

“Holbuki Transport vazirligi huzuridagi Yo‘l qurilish ishlari sifatini nazorat qilish inspeksiyasi tomonidan so‘nggi ikki yilda 2 mingdan ortiq qonun buzilish holatlari aniqlangan bo‘lsa-da, prokuratura organlariga bor-yo‘g‘i 8 ta material yuborilgan”, — deydi senator.

Senatorlar hukumatning axborotidan qoniqmagani sababli 5-fevralga qadar manfaatdor vazirlik va idoralarni jalb etgan holda ushbu sohadagi muammo, kamchiliklarni qo‘shimcha ravishda o‘rganish va ularni yechimi yuzasidan aniq axborot tayyorlash vazifasi yuklatilgan.

Eslatib o‘tamiz, mart oyida 2021-yili Toshkentning yo‘l infratuzilmasi va ichki markaziy ko‘chalarini ta’mirlashga 467,3 milliard so‘m yo‘naltirilishi ma’lum bo‘lgandi.