Shirali ovozi, mahorati va tashqi ko‘rinishi bilan muxlislar qalbidan joy olgan turk xonandasi Tarkan 17-oktabr kuni 49 yoshni qarshiladi.
Xonanda 1972-yilda kelib chiqishi turklardan bo‘lgan Germaniyadagi ko‘p farzandli oilada dunyoga kelgan. Onasi Neshe unga homiladorlik vaqtida avtohalokatga uchrab, bir oy davomida komada bo‘lgan. Bolaning hayoti xavf ostida deb hisoblagan shifokorlar homilani oldirib tashlashni maslahat bergan. Ammo otasi Alibey boshida yulduzi bor bolakayni tushida ko‘rib, nima bo‘lsa ham o‘g‘li dunyoga kelishi kerak deb hisoblaydi. Shifokorlarning xavotiriga qaramay bola sog‘lom tug‘iladi. Onasining so‘zlariga ko‘ra, Tarkanning yig‘isi kuchliligidan hamshiralardan biri uni kelajakda xonanda bo‘lishini taxmin qilgan, hatto. Bolakayga Husametin Tarkan deb ism qo‘yiladi. Husametin “o‘tkir qilich” ma’nosini anglatadi.
Onasi tomonidan Tarkanning qo‘shiqchi qarindoshlari bisyor bo‘lgan, xonadonlarida esa hamisha musiqa yangrab turgan. Shuning ta’sirida bo‘lsa kerak, yosh Tarkanda san’atga qiziqish paydo bo‘la boshlagan va ota-onasi o‘g‘lining musiqa borasidagi qobiliyatiga e’tibor bermay qolmagan. Uni qo‘llab-quvvatlash maqsadida shu yo‘nalishda ta’lim olishini ma’qul deb bilishgan. 1986-yil Germaniyadan Istanbul yaqinidagi Karamursel shahriga ko‘chib kelganidan keyin Tarkan musiqa bilan shug‘ullana boshlagan.
18 yoshida Istanbul tomon yo‘l olgan bo‘lajak xonanda muhandislikka o‘qimoqchi bo‘ladi. Ammo nima ham bo‘ladi-yu musiqiy akademiyaga qabul qilinadi. Moddiy yetishmovchilik sabab choyxona, restoran va to‘ylarda ishlab pul topishiga to‘g‘ri keladi. Akademiyani 1992-yilda tamomlaydi. Bu vaqtda kursdoshi Alpay Aldin bilan birga birinchi albom ustida ishlay boshlaydi. U musiqani Alpay esa so‘zlarini yozadi. 1992-yilda “Yine Sensiz” nomli ilk albomini taqdim qiladi. Unda turkcha milliy va yevropacha pop musiqani o‘zida mujassam qilgani uning mashhurlikka erishishiga sabab bo‘ladi. Albom 700 ming nusxada sotiladi, Tarkan esa yulduzga aylanadi.
Zabt etilgan Istanbul, Nyu-York va Yevropa
1994-yilda ikkinchi “Aacayipsin” nomli albomini taqdim qiladi. Undan Sezen Aksu tomonidan yozilgan ikkita qo‘shiq o‘rin olgan. “Hepsi Senin Mi?!”, “Şıkıdım” singari qo‘shiqlar nafaqat Yevropa, balki O‘zbekistonda ham mashhurlikka erishgan. Muvaffaqiyatga erishganidan keyin Tarkan Amerikaga jo‘nab ketgan. U yerda Nyu-York kollejida o‘qish bilan birga ingliz tilini mukammal o‘rganmoqchi bo‘ladi. Fursatdan foydalanib ingliz tilidagi ilk albomi tayyorlashga kirishadi, ammo taqdir taqozosi bilan ushbu ijod mahsuli 10 yil o‘tibgina taqdim qilinadi. Xonanda AQShdan qaytganidan keyin Yevropani zabt etishga kirishadi.
1997-yilda uchinchi “Ölürüm Sana” albomi taqdim qilinadi. Albom Yevropa va Meksikada mashhurlikka erishadi. 90-yillar oxirida Tarkan “Eng muvaffaqiyatli turk san’atkori” sifatida World Music Awards mukofotiga sazovor bo‘ladi, Universal Music Group bilan shartnoma imzolaydi.
Harbiy xizmat, villadagi hayot
Tarkan harbiy xizmatga unchalik oshiqmagan. Ammo baxtsiz tasodif u uchun ayni muddao bo‘lgan. 1999-yil Turkiyaning Izmir shahrida kuchli zilzila sodir bo‘lgan. Uning oqibatlarini bartaraf qilish uchun hukumat tomonidan maxsus qonun qabul qilingan. Unga ko‘ra armiyada xizmat qilish 6-12 oydan 4 haftagacha qisqartirilgan. Buning uchun jabrdiydalar uchun ochilgan fondga 16 ming dollar miqdorda mablag‘ xayriya qilish kerak bo‘lgan. Tarkan bu imkoniyatdan samarali foydalangan. U shunchaki kerakli mablag‘ni to‘lashning o‘zi bilan cheklanmagan, armiyaga ketishdan oldin Istanbulda xayriya konserti bergan. Tarkan musiqiy karyerasini davom ettirish bilan birga reklama biznesida ham o‘zini sinab ko‘radi. 2001-yilda u Pepsi’ning Turkiyadagi yuzi bo‘ldi.
2002-yilgi jahon chempionatida Turkiya terma jamoasi uchun “Bir Ölürüz Yolunda” nomli qo‘shiq kuylagan. Keyinroq o‘z nomi bilan atalgan kosmetik brendga asos solgan. So‘nggi “10” nomli albomi 2017-yilda taqdim qilingan.
2016-yilda Tarkan 5 yildan buyon munosabatda bo‘lgan Pinar Dilek bilan turmush qurgan. Tarkandan 14 yosh kichik bo‘lgan qiz uning ashaddiy muxlisalaridan biri bo‘lgan.
2018-yilda u Instagram sahifasiga yangi tug‘ilgan qizi Liyaning suratini joylagan.
Otalik baxtidan masrur xonanda bugungi kunda Istanbuldagi villasida oilasi bilan birga hayot kechiradi.
Izoh (0)