Dunyo va o‘zbek sportiga oid 12-oktabr kunining eng muhim xabarlari dayjesti bilan tanishing.
O‘zbekiston
O‘zbekistonlik yosh dzyudochilar JChda 1 ta kumush va 1 ta bronza medal qo‘lga kiritdi
Italiyaning Olbiya shahrida 6—10-oktabr kunlari dzyudo bo‘yicha yoshlar o‘rtasidagi Jahon chempionati bo‘lib o‘tdi.
Mazkur musobaqada Ulug‘bek Azizov murabbiyligidagi 21 yoshgacha bo‘lgan O‘zbekiston terma jamoasi ham ishtirok etib, yakunda 1 ta kumush va 1 ta bronza medal bilan 80 ga yaqin davlat orasida 11-o‘rinni egalladi. Suhrob Rajabov (-100 kg) kumush medalga ega chiqqan bo‘lsa, O‘tkirbek To‘raboyev (-100 kg) bronza medalni o‘ziniki qildi.
O‘zbekiston terma jamoasi o‘rtoqlik o‘yinida Iordaniyaga yirik hisobda mag‘lub bo‘ldi
Futbol bo‘yicha O‘zbekiston milliy terma jamoasi o‘rtoqlik o‘yinida 0:3 hisobida Iordaniyaga mag‘lub bo‘ldi.
O‘yin davomida aytarlik hech qanday xavfli vaziyat yuzaga keltira olmagan Srechko Katanes shogirdlari o‘z darvozalaridan javobsiz 3 ta gol o‘tkazib yubordi.
Jamoa bungacha 9-oktabr kuni Malayziya ustidan 5:1 hisobida zafar quchgandi.
O‘smirlar o‘rtasidagi Jahon chempionatida 11 ta medal qo‘lga kiritildi
Saudiya Arabistonining Jidda shahrida og‘ir atletika bo‘yicha o‘smirlar va qizlar o‘rtasidagi Jahon chempionati o‘z yakuniga yetdi.
Unda ishtirok etgan O‘zbekiston terma jamoasi 4 tadan oltin va kumush hamda 3 ta bronza, jami 11 ta medalga ega chiqdi. Bu natija bilan O‘zbekiston delegatsiyasi umumjamoa hisobida Rossiya terma jamoasidan ortda qolgan holda Tailand bilan birgalikda 2—3-o‘rinni egalladi.
O‘smirlar o‘rtasidagi Jahon chempionatida g‘olib va sovrindor bo‘lgan sportchilar:
- -96 kg: Qurbonmurod Nomozov — 3 ta oltin;
- -73 kg: Diyorbek Ermatov — 1 ta oltin;
- -71 kg: Nigora Suvonova — 3 ta kumush;
- -55 kg: Ozoda Hojiyeva — 1 ta kumush, 1 ta bronza;
- -61 kg: Xusinboy Matrasulov — 1 ta bronza;
- -71 kg: Sevinchoy Komilova — 1 ta bronza.
Ramos “PSJ”da qachon debyut qilishi ma’lum bo‘ldi
“PSJ” himoyachisi Serxio Ramos Liga 1 ning 10-turidan o‘rin olgan “Anjer”ga qarshi o‘yinda maydonga tushishi kutilmoqda, deb yozdi Get French Football News nashri.
Qayd etish kerak, agar Ramos ushbu bahsda maydonga tushsa, bu u uchun Parij klubidagi ilk o‘yin bo‘ladi. U “PSJ”ga yozda o‘tganidan beri jarohati tufayli hali birorta ham o‘yin o‘tkazgani yo‘q.
“PSJ” — “Anjer” uchrashuvi 15-oktabr kuni bo‘lib o‘tadi.
Memfis Depay Patrik Klyuyvertning rekordini takrorladi
Niderlandiya terma jamoasi hujumchisi Memfis Depay JCh—2022 saralashi doirasidagi Gibraltarga qarshi o‘yinda (6:0) dubl qayd etdi.
Bu Depayning terma jamoa safidagi 2021-yildagi 13 va 14-gollari bo‘ldi. Bunga qadar Niderlandiya terma jamoasi safida hech bir o‘yinchi bir yil davomida buncha gol urmagan.
Depaygacha bu borada eng yaxshi natija Patrik Klyuyvertga tegishli edi, u 2000-yilda bir yil davomida 12 ta gol urgandi.
Germaniya muddatidan oldin JCh yo‘llanmasini qo‘lga kiritdi
Germaniya terma jamoasi JCh—2022 saralash bosqichining 8-turida Shimoliy Makedoniyani mag‘lub etdi (4:0).
Hans-Diter Flik shogirdlarining ochkolari 21 taga yetdi va jamoa saralash o‘yinlari yakunlanishiga 2 tur qolganida muddatidan oldin Qatar—2022 yo‘llanmasini qo‘lga kiritdi. Jamoa ikkinchi o‘rindagi Ruminiyadan 8 ochko ilgarilab ketgan.
Shu tariqa nemislar Yevropa qit’asida mundial yo‘llanmasiga ega chiqqan ilk jamoaga aylandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)