Xitoy Kasalliklarni nazorat qilish va profilaktika markazi (CDC) rahbari Gao Fu kelajakda insoniyat yangi “X virusi”ga duch kelishi mumkinligini aytdi va unga qarshi kurashga tayyorgarlik ko‘rish uchun birgalikdagi harakat tamoyilini taklif qildi. Gao Fu bu haqda “Jamiyatda fan va texnologiyalar” Kyoto onlayn-forumi doirasida aytib o‘tgan deb yozadi “RBK”.
Foto: “TASS”
CDC rahbarining so‘zlariga ko‘ra, koronavirusga qarshi kurash olib borayotganiga qaramay, kelajakda dunyo, albatta, hali xususiyatlari hech kimga ma’lum bo‘lmagan “X virusi” bilan to‘qnash keladi. Gao Funing ta’kidlashicha, bu istalgan paytda, istalgan joyda sodir bo‘lishi mumkin.
“Insoniyat kelajagi uchun biz muammoni birgalikda hal qilishimiz kerak. Shu munosabat bilan men “to‘rtta C tamoyilini” taklif qilaman: hamkorlik (cooperation), raqobat (competition), ma’lumot almashish (communication) va ba’zan uchinchi tomon bilan muvofiqlashtirish (coordination)” — deya qo‘shimcha qildi u.
Shuningdek, CDC rahbarining ta’kidlashicha, insoniyat bugun nafaqat koronavirus pandemiyasiga, balki “dolzarb va noto‘g‘ri ma’lumotlar qorishib ketadigan infodemiya”ga ham qarshi kurashmoqda.
2020-yilning mart oyida Yevropa Ittifoqi va Jahon sog‘liqni saqlash tashkiloti (JSST) 25 ta mamlakat rahbarlari bilan kelishgan holda OAV va JSST veb-saytida ochiq xat e’lon qilgandi. Xatda COVID-19 singari pandemiya holatlari uchun xalqaro hamkorlik shartnomasini ishlab chiqishga chaqirilgan.
Maktubni imzolaganlar orasida JSST bosh direktori Tedros Gebreyesus, Yevropa Kengashi raisi Sharl Mishel, Buyuk Britaniya bosh vaziri Boris Jonson, Germaniya kansleri Angela Merkel, Fransiya prezidenti Emmanuel Makron, Janubiy Afrika Respublikasi prezidenti Siril Ramafosa, Janubiy Koreya prezidenti Mun Chje In, Serbiya prezidenti Aleksandr Vuchich, Ukraina prezidenti Vladimir Zelenskiy va boshqa bir qator davlat rahbarlari bor.
Maktubda aytilishicha, “COVID-19 pandemiyasi dunyo hamjamiyati uchun 1940-yillar davridan keyingi eng jiddiy muammoga aylandi. Halokatli ikki jahon urushi yakunida siyosiy rahbarlar birlashib ko‘p qirrali tizim yaratgan edi. Unda aniq maqsadlar qo‘yilgan, jumladan, mamlakatlararo iliq munosabat yaratish, yakkalanish va millatchilik vasvasalarini bartaraf etish, tinchlik, farovonlik, sog‘liq va xavfsizlikka oid muammolarni hal qilish kabi”.
“Pandemiyaga tayyorgarlik va ularga qarshi kurashish to‘g‘risida yangi xalqaro shartnoma tuzishda dunyo mamlakatlari birgalikda harakat qilishi kerakligiga shubhamiz yo‘q. Ushbu yangi jamoaviy majburiyat pandemiyaga tayyorgarlikning eng yuqori siyosiy darajadagi tarixiy bosqichi bo‘lishi mumkin”, — deyiladi qo‘shma bayonotda.
