O‘zbekistonda 1-oktabr davlat OTMga tabaqalashtirilgan to‘lov-shartnoma asosida o‘qishga qabul qilish bo‘yicha ariza topshirishning so‘nggi muddati etib belgilangan edi.
Oliy va o‘rta maxsus ta’lim vazirligi xabar berishicha, 2021-o‘quv yilida talabalikka tavsiya etilmagan, biroq tabaqalashtirilgan (super) to‘lov-shartnoma asosida o‘qish istagini bildirgan abituriyentlar uchun qulaylik yaratish maqsadida onlayn shaklda ariza qoldirish hamda tabaqalashtirilgan to‘lov-shartnomalarni onlayn olish imkonini beruvchi “t-kontrakt.edu.uz” axborot tizimi ishga tushirildi.
Qayd etilishicha ushbu tizim:
- ortiqcha ovoragarchilik va suiiste’molchiliklarning oldini olish;
- jarayonlarning ochiqligi va shaffofligini ta’minlash;
- elektron arizalarni avtomatik shakllantirish;
- to‘lov-shartnomalarni avtomatik rasmiylashtirish imkonini beradi.
“Endi abituriyentlar oliy ta’lim muassasasiga ovora bo‘lib, borib o‘tirishlari shart emas. Tizim yordamida ularning ma’lumotlari va to‘plagan balli Davlat test markazi bazasidan to‘g‘ridan to‘g‘ri olinib, elektron ko‘rinishdagi ariza asosida elektron to‘lov-shartnoma avtomatik rasmiylashtiriladi”, — deyiladi vazirlik xabarida.
