O‘zbekistonning Qanot Sharq xususiy aviakompaniyasi 18-sentabr kuni BAAning Sharja shahriga ilk parvozini amalga oshirdi. Bu haqda in4avia Telegram kanali xabar berdi. Spot’ning Flightradar24 servisiga tayanib yozishicha, ushbu reys Airbus A320−214 samolyotida amalga oshirildi.
Aviakompaniya sayti hali ham ishlab chiqish jarayonida. Real Dreams Travel Agency tomonidan joylangan e’longa ko‘ra, Qanot Sharq chiptalarni vositachilar orqali sotadi. Sharjagacha chipta narxi 270 dollarni, Toshkent—Sharja—Toshkent yo‘nalishi bo‘yicha chipta esa 370 dollarni tashkil etadi.
Sentabr oyi oxirigacha ushbu yo‘nalish bo‘yicha yana beshta reys rejalashtirilgan. Oktabr oyida kompaniya samolyoti seshanba va shanba kunlari Sharjaga uchadi.
Avvalroq Qanot Sharq hududiy aeroportlardan Istanbul, Anqara (Turkiya), Dubay (BAA), Jidda, Madina (Saudiya Arabistoni), Moskva, Sankt-Peterburg (Rossiya) va Olmaota (Qozog‘iston) kabi xalqaro yo‘nalishlarga parvoz qilishi ma’lum qilingan edi.
Ma’lumot uchun, Qanot Sharq 1998-yilda ro‘yxatga olingan hamda yuk va yo‘lovchi aviatashuvlariga ixtisoslashgan. 2003-yildan 2012-yilgacha kompaniya “O‘zbekiston havo yo‘llari” MAKdan Il-76 samolyotlarini ijaraga olgan va O‘zbekistondagi birinchi xususiy aviakompaniya o‘laroq o‘z charter reyslarini amalga oshirgan. Kompaniya 150 mingdan ortiq yo‘lovchi tashigan. Barcha Il-76 samolyotlari O‘zbekiston Mudofaa vazirligiga o‘tkazilgach, Qanot Sharq Airlines’ning ekspluatantlik sertifikati to‘xtatilgan.
2020-yilning noyabrida fuqaro aviatsiyasini tubdan takomillashtirish chora-tadbirlari to‘g‘risida prezident farmoni chiqqanidan so‘ng aviakompaniya hududiy aviatashuvchi sifatida qayta jonlantirildi.
2021-yilning aprel oyi oxirlarida ushbu xususiy aviakompaniyaga Airbus A320-214 samolyoti olib kelindi.
Izoh (0)