Ўзбекистоннинг Qanot Sharq хусусий авиакомпанияси 18 сентябрь куни БААнинг Шаржа шаҳрига илк парвозини амалга оширди. Бу ҳақда in4аvia Telegram канали хабар берди. Spot’нинг Flightradar24 сервисига таяниб ёзишича, ушбу рейс Airbus А320−214 самолётида амалга оширилди.
Авиакомпания сайти ҳали ҳам ишлаб чиқиш жараёнида. Real Dreams Travel Agency томонидан жойланган эълонга кўра, Qanot Sharq чипталарни воситачилар орқали сотади. Шаржагача чипта нархи 270 долларни, Тошкент—Шаржа—Тошкент йўналиши бўйича чипта эса 370 долларни ташкил этади.
Сентябрь ойи охиригача ушбу йўналиш бўйича яна бешта рейс режалаштирилган. Октябрь ойида компания самолёти сешанба ва шанба кунлари Шаржага учади.
Аввалроқ Qanot Sharq ҳудудий аэропортлардан Истанбул, Анқара (Туркия), Дубай (БАА), Жидда, Мадина (Саудия Арабистони), Москва, Санкт-Петербург (Россия) ва Олмаота (Қозоғистон) каби халқаро йўналишларга парвоз қилиши маълум қилинган эди.
Маълумот учун, Qanot Sharq 1998 йилда рўйхатга олинган ҳамда юк ва йўловчи авиаташувларига ихтисослашган. 2003 йилдан 2012 йилгача компания «Ўзбекистон ҳаво йўллари» МАКдан Ил-76 самолётларини ижарага олган ва Ўзбекистондаги биринчи хусусий авиакомпания ўлароқ ўз чартер рейсларини амалга оширган. Компания 150 мингдан ортиқ йўловчи ташиган. Барча Ил-76 самолётлари Ўзбекистон Мудофаа вазирлигига ўтказилгач, Qanot Sharq Airlines’нинг эксплуатантлик сертификати тўхтатилган.
2020 йилнинг ноябрида фуқаро авиациясини тубдан такомиллаштириш чора-тадбирлари тўғрисида президент фармони чиққанидан сўнг авиакомпания ҳудудий авиаташувчи сифатида қайта жонлантирилди.
2021 йилнинг апрель ойи охирларида ушбу хусусий авиакомпанияга Airbus А320-214 самолёти олиб келинди.
Изоҳ (0)