Shavkat Mirziyoyev Qosim-Jo‘mart To‘qayevga Jambil viloyatida yuz bergan portlash munosabati bilan hamdardlik bildirdi

O‘zbekiston Prezidenti Shavkat Mirziyoyev 27-avgust kuni Qozog‘iston prezidenti Qosim-Jo‘mart To‘qayev bilan telefon orqali muloqot qildi.

Suhbat avvalida davlat rahbari Qozog‘iston prezidentiga Jambil viloyati Boyzoq tumanida ro‘y bergan fojiali voqea oqibatida insonlar qurbon bo‘lgani munosabati bilan samimiy hamdardlik bildir. O‘zbekiston Qozog‘istonga favqulodda hodisa oqibatlarini bartaraf etishda zarur ko‘mak ko‘rsatishga tayyor ekani ta’kidlandi.

O‘zbekiston–Qozog‘iston munosabatlarining dolzarb masalalari ko‘rib chiqildi. Ko‘p qirrali hamkorlik ijobiy sur’at bilan rivojlanib borayotgani mamnuniyat bilan qayd etildi. Savdo, sanoat, qishloq xo‘jaligi, transport va logistika, turizm sohalarida kooperatsiya loyihalari, madaniy-gumanitar almashinuv dasturlarini ilgari surish muhim ekani ta’kidlandi.

Prezidentlar, shuningdek, mintaqa kun tartibi, avvalo, Afg‘onistondagi vaziyatning keskinlashishi yuzasidan fikr almashdi. Markaziy Osiyoda xavfsizlikni ta’minlash masalalarida yaqindan hamkorlikni davom ettirishga kelishib olindi.