Jizzax viloyatining Yangiobod tumanidagi 2-son davlat maktabgacha ta’lim tashkilotida 30-iyun kuni 6 yoshli qiz vafot etdi. Bu haqdagi xabar dastlab ijtimoiy tarmoqlarda tarqaldi.

19-avgust kuni viloyat maktabgacha ta’lim boshqarmasi matbuot xizmati tarqalgan xabarga rasmiy munosabat bildirdi. Unga ko‘ra, 2015-yilda tug‘ilgan tarbiyalanuvchi R.D. 30-iyun kuni bog‘chaga yaxshi holatda kelgan. Shifokor uni tibbiy tekshiruvdan o‘tkazganidan so‘ng tarbiyachi va yordamchi tarbiyachi qabul qilib olgan.

Tushlikdan so‘ng tarbiyachilar tomonidan bolalarga sog‘lomlashtiruvchi badantarbiya mashg‘ulotlari o‘tilib, bolalar uyquga yotqizilgan. Shu kuni 14:30 lar atrofida yordamchi tarbiyachi bolalarni uyqudan uyg‘otayotganda 6 yoshli R.D.ning bezovtalanayotgani, ya’ni burni qonayotgani ma’lum bo‘lgan. Tarbiyachi shu zahotiyoq tez tibbiy yordamga murojaat qilgan va bu haqda tuman maktabgacha ta’lim bo‘limiga xabar berilgan.

“Daryo” so‘roviga asosan Bosh prokuratura matbuot xizmatining ma’lum qilishicha, qizcha zudlik bilan tuman tibbiyot birlashmasiga keltirilgan, biroq birlashma shifokorlari tomonidan uning vafot etgani aniqlangan.

Holat yuzasidan tuman prokuraturasi tomonidan tergovga qadar tekshiruv harakatlari olib borilgan bo‘lib, tekshiruv harakatlari davomida voqea sodir bo‘lgan kuni tuman prokuraturasi xodimlari va boshqa tezkor tergov guruhi vakillari voqea joyiga chiqib, hodisa joyi ko‘zdan kechirilgan. R.D.ning o‘limi sabablarini aniqlash maqsadida sudga oid tibbiy ekspertiza tayinlangan va tegishli fuqarolardan tushuntirish xatlari olingan.

Sud tibbiy ekspertizasining 27-iyuldagi xulosasiga ko‘ra R.D.ning o‘limiga yuqori nafas yo‘llarini qusuq massasi bilan berkilishi oqibatidagi mexanik asfiksiyadan yuzaga kelganligi, murda tanasida biror-bir tan jarohatlari aniqlanmaganligi ko‘rsatilgan.

Tergovga qadar tekshiruv harakatlari davomida to‘plangan bir qator ma’lumotlar, holat yuzasidan so‘ralgan fuqarolarning tushuntirish xatlari, ish holatlari bo‘yicha to‘plangan boshqa dalillarga ko‘ra, 6 yoshli R.D.ning vafot etganligi holatida biror-bir shaxsning harakatlarida jinoyat tarkibi aniqlanmaganligi sababli 30-iyul kuni jinoyat ishi qo‘zg‘atishni rad qilish to‘g‘risida qaror qabul qilingan.