Toshkent shahar IIBB Yashnobod tumanida huquq-tartibot organi xodimlari va garajining buzilishiga qarshi chiqqan fuqaro o‘rtasida yuzaga kelgan mojaroga munosabat bildirdi.
Ma’lum qilinishicha, 18-avgust kuni Yashnobod tumani IIO FMBga Jarqo‘rg‘on ko‘chasida janjal bo‘layotgani haqida xabar kelib tushgan. Voqea joyiga yetib borgan profilaktika inspektori Z.Baimbetov 1978-yilda tug‘ilgan K.Olga tuman hokimiyati vakillariga qarshilik ko‘rsatayotganiga guvoh bo‘lgan.
Aniqlanishicha, “Jarqo‘rg‘on” mahalla fuqarolar yig‘ini hududida “Obod mahalla” dasturi doirasida olib borilayotgan keng ko‘lamdagi obodonlashtirish va ko‘kalamzorlashtirish ishlarida mahallada joylashgan noqonuniy qurilmalar buzilayotgan bo‘lgan.
Shu hududda istiqomat qiluvchi K.Olgaga tegishli bo‘lgan garaj noqonuniy qurilgani sababli olib tashlashi lozimligi haqida tuman hokimiyati tomonidan u bir necha marotaba ogohlantirilgan. Shunga qaramasdan, garajni o‘z ixtiyori bilan olib tashlamagan ayol hokimiyat vakillari tomonidan buzilishiga qarshilik ko‘rsatib, ularni haqorat qilgan va janjal ko‘targan.
Profilaktika inspektori tomonidan janjalni to‘xtatish, jamoat tartibini saqlash, vaziyatni yumshatish va holatni to‘liq o‘rganish maqsadida K.Olgaga tinchlanishi aytilgan va mahalladagi tayanch punktga taklif etilgan. Biroq K.Olga IIO xodimining qonuniy talablarini bajarmasdan, unga faol qarshilik ko‘rsatgan, atrofdagi fuqarolarni o‘ziga jalb qilish maqsadida baqir-chaqir qilib, to‘polon ko‘targan.
Shundan so‘ng profilaktika inspektori K.Olgaga kuch ishlatib xizmat mashinasiga o‘tqazgan. K.Olgaga nisbatan Ma’muriy javobgarlik to‘g‘risidagi kodeksning 194-moddasi (ichki ishlar organlari xodimining qonuniy talablarini bajarmaslik) 1-qismi hamda 198-moddasi bilan hujjatlar rasmiylashtirilib, o‘rnatilgan tartibda ko‘rib chiqish uchun Jinoyat ishlari bo‘yicha Yashnobod tumani sudiga yuborilgan.
Profilaktika inspektori ayol kishiga qo‘pol munosabatda bo‘lgani bo‘yicha Toshkent shahar IIBB rahbariyati tomonidan xizmat tekshiruvi tayinlangan.
Avvalroq Toshkentda qovun-tarvuz sotuvchisi va IIB xodimlari o‘rtasida janjal aks etgan video yuzasidan izoh berilgandi.
Mavzuga doir:
- IIB xodimlari tomonidan olib ketilgach vafot etgan fuqaroni “Xudo urgan odam” degani uchun IIV matbuot kotibiga chora ko‘rildi
- Toshkentda mast IIB xodimi 80 yoshli otaxonni niqob taqmagani uchun kuch ishlatib olib ketmoqchi bo‘lgani aytilgan video yuzasidan rasmiy ma’lumot berildi
- Qo‘yliq bozorida IIB xodimlari sotuvchi ayolga kuch ishlatgani aks etgan video tarqaldi. IIV holat bo‘yicha izoh berdi
Izoh (0)