Fransiyada yoshlar Pass Sanitaire sanitariya ruxsatnomasini olish sharti sifatida koronavirusga qarshi emlanmaslik uchun ataylab virusni o‘zlariga yuqtirmoqda. Bu haqda Focus nashri xabar berdi.
Fransiyada jamoatchilik joylariga tashrif buyurish uchun sanitariya ruxsatnomasiga ega bo‘lish shart, u esa faqat kasallanib o‘tgan yoki vaksina olgan fransuzlarga beriladi.
Yoshlardan biri nashrga ma’lum qilishicha, tezroq virusni yuqtirish, so‘ng sog‘ayib, ruxsatnoma olish uchun ular niqob taqmay va qo‘llarini yuvmay qo‘ygan. Ular immunitet “kasallikni tabiiy yo‘l bilan yengish”ni o‘rganishi tarafdori.
“Umrimning oxirigacha har uch oyda vaksina olganimdan ko‘ra, bir marta COVID-19 ga chalinganim afzalroq”, — deb yozadi yana bir yigit ijtimoiy tarmoqda.
Kasallikka nisbatan bunday munosabatni mutaxassislar qoralamoqda. “Ular haqiqiy xavfni tushunmayapti. Virus bilan bunday o‘yinlarni o‘ynash — butunlay xato ish. Yoshlar o‘zlarini xavfsiz his qilib kelayotgan edi, ammo so‘nggi vaqtlarda COVID-19 ga chalinib, intensiv davolash bo‘limlarida yotgan bemorlarning o‘rtacha yoshi pasaydi. Infeksiya dastlab simptomsiz kechsa-da, uning uzoq muddatli asoratlari xavfini istisno qilib bo‘lmaydi”, — deya aniqlik kiritdi epidemiolog Filipp Amuayel.
Ayni paytda Fransiyada sanitariya ruxsatnomalariga qarshi norozilik aksiyalari davom etmoqda. 7-avgust, shanba kuni mamlakatning 150 ta shaharlarida kamida 237 ming kishi namoyishlarda qatnashdi, Parijning o‘zida 17 ming kishi ko‘chalarga chiqdi.
Bu sanitariya ruxsatnomalari joriy etilishiga qarshi qarshi fuqarolar ommaviy noroziliklar uyushtirayotgan to‘rtinchi shanbadir. O‘tgan safar, Ichki ishlar vazirligi ma’lumotlariga ko‘ra, namoyishlarda 204 ming kishi qatnashgan. Shu safar norozilik aksiyalariga hatto kuchli yomg‘irlar ham xalal bera olmadi, Parijda aksiyalar do‘l ostida yakunlandi.
Butun mamlakat bo‘ylab 198 ta norozilik aksiyasi bo‘lib o‘tdi, umuman olganda, vaziyat tinchigan bo‘lgan bo‘lsa-da, ba’zi joylarda politsiya bilan to‘qnashuvlar yuz berdi, oqibatda namoyishchilarga qarshi ko‘zni yoshlantiruvchi gaz qo‘llanildi. 35 kishi qo‘lga olindi, yetti nafar politsiyachi yengil jarohatlar oldi.
Sanitariya ruxsatnomasiga qarshi bo‘lganlar fikricha, hukumat vaksina olmagan fuqarolarning harakatlanishini cheklab qo‘yish orqali, ularning asosiy huquqlarini buzmoqda. Fransiya muxolifati hukumat yangi cheklovlarni hech bo‘lmaganda kechiktirib turishi kerak, degan fikrda.
Shu hafta Fransiya Konstitutsiyaviy kengashi sanitariya ruxsatnomalari amal qiladigan zonalarni kengaytirish haqidagi qonun loyihasini ma’qulladi, xususan, restoranlarga tashrif buyurish, mamlakat ichida poyezd va samolyotlarda safar qilish ham kiritildi. Ushbu qonun loyihasi avvalroq Fransiya parlamentining ikkala palatasi tomonidan ham ma’qullangan edi.
Aynan Konstitutsiyaviy kengash hukumat tomonidan rejalashtirilgan choralarning ma’qullanishiga to‘sqinlik qilish imkoniyatiga ega bo‘lgan so‘nggi instansiya edi.
Fransiya hukumati rejalariga ko‘ra, qonun 9-avgust kuni kuchga kiradi. U holda 9-avgustdan kafe va restoranlarga kirishda, transportga chiqishda (shahar jamoatchilik transportidan tashqari) sanitariya ruxsatnomasini taqdim etish kerak bo‘ladi. Ushbu hujjatda fuqaroning COVID-19 ga qarshi emlangani yoki yaqinda virusga qarshi manfiy natijali test topshirgani ko‘rsatilishi kerak.
Izoh (0)