“Daryo”ning “Yangiliklarni o‘qing va sovg‘alarga ega bo‘ling!” tanlovi bosh sovrini — MacBook Air o‘z egasiga topshirildi

“Daryo” internet-nashri tomonidan Telegram platformasida o‘tkazilgan “Yangiliklarni o‘qing va sovg‘alarga ega bo‘ling!” tanlovining yakuniy g‘olibiga bosh sovrin — MacBook Air noutbuki topshirildi.

“Yangiliklarni o‘qing va sovg‘alarga ega bo‘ling!” tanlovi 7-iyun kuni boshlangan bo‘lib, besh hafta — 12-iyulga qadar davom etdi. Ammo koronavirus pandemiyasi bilan bog‘liq ko‘zda tutilmagan holatlar yuzaga kelgani bois, tanlovning to‘rtinchi va beshinchi (yakuniy) g‘oliblariga va’da qilingan sovrinlarni topshirish biroz kechikdi.

Tanlov shartlariga muvofiq, g‘olib nomi 12-iyul kuni ishtirokchilar orasida tasodifiy tanlash yo‘li bilan (Random.org xizmati orqali) aniqlangan edi. Unga ko‘ra, qashqadaryolik Sherzod Aliqulov bosh sovrin — MacBook Air noutbuki egasiga aylangan. 29-iyul kuni qimmatbaho sovg‘a o‘z egasiga topshirildi.

“Daryo” internet-nashrini bir yildan beri muntazam kuzatib kelayotgan Sherzodning aytishicha, u bungacha hech qachon bu kabi tanlovlarda qatnashmagan. “Tavakkal qilgancha, ‘Yangiliklarni o‘qing va sovg‘alarga ega bo‘ling!’ tanlovida qatnashib ko‘rdim. Buni qarangki, sovrin aynan menga chiqdi! Barchaga ‘Daryo’ internet-nashrini kuzatib borishni tavsiya qilgan bo‘lar edim”, — deydi u.

Eslatib o‘tamiz, tanlovning dastlabki to‘rt bosqichida nukuslik Nurlan Sitayev, qashqadaryolik Azamat To‘rayev, quyi chirchiqlik Rustamjon Shakramov va namanganlik Mansurjon Abdullayev g‘oliblikni qo‘lga kiritgan edi. Ularning barchasiga iPhone 12 smartfoni topshirilgan.

“Daryo” internet-nashrining Telegram’dagi kanaliga obuna bo‘lishni unutmang — kelgusi sovrinli tanlovlar haqida aynan @daryo kanalidan xabar topasiz.