Samarqanddagi restoranda mushtlashuv bo‘ldi. Voqea ishtirokchilaridan biri og‘ir ahvolda shifoxonaga yotqizilgan

Samarqand shahridagi “Shuhrat” restoranida 2021-yilning 18-iyul kuni soat 15:30 da janjal yuzaga kelgan. Natijada restoran egasining 2002-yilda tug‘ilgan farzandi og‘ir jarohat olib shifoxonaga yotqizilgan. Bu haqda “Daryo” muxbiri Farhod Norbo‘tayev xabar bermoqda.

Ma’lum bo‘lishicha, restoranda to‘y qilishga buyurtma bergan fuqaroning qarindoshlari va jiyanlari restoranga bostirib kirib, nega mehmonlar haligacha kiritilmayotganini so‘ragan va baqir-chaqir qilgan. Restoran egasi esa dasturxon tayyor emasligi, tayyor bo‘lgandan so‘ng restoranga kirishga ruxsat berishini aytgan. Biroq mehmonlar restoran egasini haqorat qilgan.

Natijada janjal yuzaga kelib, restoranga kirgan fuqarolar restoran egasi, uning turmush o‘rtog‘i va farzandini kaltaklagan. Olgan tan jarohatlaridan so‘ng restoran egasining 2002-yilda tug‘ilgan farzandi Ya.Ya. og‘ir tan jarohat olib, shifoxonaga yotqizilgan.

Restoran egasining ma’lum qilishicha, voqeaning ertasi kuni, 19-iyulda janjal ishtirokchilaridan biri restoran ishchisi O.Ya.ni ham urgan.

Samarqand viloyati IIB axborot xizmati rahbari Jahongir Sagdullayevning ma’lum qilishicha, holat yuzasidan Jinoyat kodeksining 104-moddasi (qasddan badanga og‘ir shikast yetkazish) bilan jinoyat ishi qo‘zg‘atilib, janjal ishtirokchilaridan biri qamoqqa olingan.

Voqea yuzasidan “Daryo” muxbiri jurnalistik surishtiruv olib bormoqda.