Toshkent shahrining 11 ta tumanida koronavirus infeksiyasiga gumon qilingan shaxslar hamda ushbu infeksiya tasdiqlangan bemorlar uchun maxsus poliklinikalar tashkil etildi. Bu haqda Sog‘liqni saqlash vazirligi matbuot xizmati xabar berdi.
Qayd etilishicha, u yerda birlamchi tibbiy-sanitariya yordamini ko‘rsatish, zarur laborator hamda instrumental tekshiruvlar o‘tkazish, tekshiruv natijalaridan kelib chiqqan holda ularga davo muolajalarini tavsiya qilish va ambulator davolash yo‘lga qo‘yiladi.
Tibbiy-sanitariya muassasalari va xizmat ko‘rsatish yo‘nalishi yaqin bo‘lgan dispanserlar binosida faoliyat boshlagan mazkur poliklinikalar aholiga kun-u tun xizmat ko‘rsatishi belgilangan bo‘lib, har bir markazga 3 tadan tibbiy brigada biriktirilgan va ular tarkibidan 2 nafar shifokor hamda 2 nafar o‘rta tibbiyot xodimi o‘rin olgan.
Shuningdek, bemorlarga shoshilinch tibbiy yordam ko‘rsatish maqsadida ushbu poliklinikalar rentgen, kislorod kondensatorlari, pulsoksimetr, zarur dori-darmonlar, sarflov materiallari, dezinfeksiyalovchi eritma va reaktivlar, shuningdek, maxsus tibbiyot vositalari bilan ta’minlangan.
“Ta’kidlash lozimki, ayni paytda poytaxtdagi barcha oilaviy poliklinikalar ushbu poliklinikalar bilan integratsiya asosida faoliyat yuritayotgan bo‘lib, u yerga koronavirus infeksiyasiga gumondor hamda infeksiya tasdiqlangan shaxslar oilaviy poliklinikalar yo‘llanmasi va ‘103’ xizmati orqali yoki o‘zlari mustaqil ravishda ham murojaat qilishlari mumkin.
Agar tez tibbiy yordam xizmatiga murojaat qilgan fuqaroning shikoyatlariga ko‘ra, unda koronavirus kasalligi gumon qilinsa, bemorga o‘zi yashaydigan tumandagi maxsus poliklinikaga borish tavsiya etiladi. Biroq uning holat va imkoniyati bunga monelik qilsa, bemorning uy manzili yozib olinadi va u haqidagi ma’lumot maxsus poliklinikaga taqdim etiladi. So‘ng bemor maxsus poliklinika uchun ajratilgan avtotransport vositasi yordamida u yerga olib kelinadi va belgilangan standartlar bo‘yicha tibbiy-sanitariya yordami ko‘rsatiladi”, — deyiladi vazirlik xabarida.
Shuningdek, qo‘shimcha qilinishicha, maxsus poliklinikaga murojaat qilgan bemorlar uchun maxsus karta yuritilib, unda fuqaroning dinamik holati, tekshiruv va davolash natijalari qayd etib boriladi.
Murojaat qilganlar orasida COVID-19 infeksiyasi tasdiqlanmagan bemorlar bo‘lsa, ulardan kerakli tahlillar olinadi va tezkor ravishda hududiy sanitariya xizmati laboratoriyalariga yetkaziladi. Shu bilan birga, bemorlar og‘irlik darajasiga ko‘ra saralanib, ahvoli yengil fuqarolarga uyda davolanishlari uchun zarur tavsiyalar beriladi. Biroq bemorning ahvoli og‘ir bo‘lsa, u zudlik bilan maxsus shifoxonaga yuboriladi va bu haqida fuqaro istiqomat qiladigan hududdagi oilaviy poliklinikaga xabar qilinadi.
Vazirlik ma’lumotlariga ko‘ra, O‘zbekistonda 12-iyul kuni 497 kishida koronavirus aniqlandi, shundan 122 nafari Toshkent shahrida qayd etildi.
Mamlakatda, ayniqsa, poytaxtda kasallanish holatlari ortayotgani tufayli kovid-markazlar qayta ochilmoqda. Xususan, Toshkentda DXX tasarrufidagi “Yoshlik” sport majmuasida, IIV tasarrufidagi “Universal” sport majmuasida 700 koyka-o‘ringa mo‘ljallangan kovid-markaz, “O‘zekspomarkaz”da 750 o‘rinli koronavirusga chalingan bemorlarni davolashga ixtisoslashgan markaz qaytadan tashkil etildi.
Uchtepa tumanidagi sport saroyida COVID-19 bilan kasallangan bemorlarni davolash uchun 100 o‘ringa mo‘ljallangan zaxira markazi, Jahon tillari universiteti talabalar turar joyida 300 o‘ringa mo‘ljallangan zaxira markazi tayyorlanmoqda.
Toshkent shahrida aholini emlash uchun maxsus avtobuslar yo‘lga qo‘yildi.
Izoh (0)