Italiyada niqobsiz yurish mumkin bo‘ldi, Lyuksemburg bosh vaziri koronavirusga chalindi, Saudiyada o‘smirlarni emlashga ruxsat berildi. Koronaxabarlar

Dunyoda koronavirusga chalinganlar soni 181 131 203 kishiga yetdi, shularning 3 923 885 nafari vafot etgan. Kasallanish holatlarining ko‘pligi bo‘yicha AQSh (33,6 million kishi), Hindiston (30,2 million), Braziliya (18,4 million), Fransiya (5,8 million) va Turkiya (5,4 million) hamon yetakchilik qilmoqda.

Italiyada niqob taqish majburiyati bekor qilindi

Italiyada bugun, 28-iyundan ochiq havoda niqob taqish shart emas. 21-iyun kuni mamlakatda komendantlik soati bekor qilingan edi. O‘sha kuni Pandemiyaga qarshi kurashni nazorat qiluvchi ilmiy-texnik qo‘mita (CTS) qaroriga binoan, Italiya sog‘liqni saqlash vaziri Roberto Speranza 28-iyundan ochiq havoda niqob taqish majburiyati bekor qilinishini, ammo CTS’ning barcha ko‘rsatmalari saqlanib qolishini e’lon qildi.

CTS vakillari aniqlik kiritishicha, 28-iyundan mamlakatning butun hududi “oq” zonaga o‘tib, barcha asosiy cheklovlar bekor qilindi, shu jumladan, ko‘chada niqob taqish ham. Agar epidemiologik vaziyat yomonlashsa, niqob rejimi yana majburiy bo‘ladi.

May oyida Italiya hukumati epidemik vaziyat yaxshilangani sababli karantin choralarini bosqichma-bosqich bekor qilishni boshladi. 21-iyundan buyon italiyaliklarning 99 foizdan ko‘prog‘i “oq” zonada qolmoqda, ushbu zonada deyarli barcha cheklovlar bekor qilingan edi, niqob taqish, ijtimoiy masofani saqlash va olomon bo‘lib to‘planmaslik majburiyati bundan mustasno.

Lyuksemburg bosh vaziri Ksavye Bettelning koronavirusga topshirgan testi ijobiy chiqdi. Vazir ikki marta testdan o‘tgan va ikkalasida ham infeksiya aniqlangan. Mamlakat Sog‘liqni saqlash vazirligining tavsiyalariga binoan, Bettel o‘zini yakkalash tartibiga o‘tdi.

RTL Today xabariga ko‘ra, Lyuksemburg bosh vazirida koronavirusning ba’zi alomatlari, jumladan, isitma va bosh og‘rig‘i kuzatilgan. Shunga qaramay, siyosatchi uydan ishlashda davom etishini ma’lum qildi.

Ksavye Bettel 6-may kuni koronavirusga qarshi AstraZeneca vaksinasining birinchi komponentini olgan. Ikkinchi komponent unga kelasi hafta yuborilishi kerak edi.

Siyosatchi infeksiyaga chalingani haqida Yevropa Ittifoqi sammitidagi ishtirokidan ko‘p o‘tmay xabardor bo‘ldi. Biroq, Bettelning vakili ta’kidlashicha, vazir barcha ehtiyot choralarini ko‘rgan va yaqindan muloqot qilganlari ro‘yxatida uchrashuv ishtirokchilarining birortasi yo‘q.

Saudiya Arabistoni hukumati 12 yoshdan 18 yoshgacha bo‘lgan guruhdagi aholining bir qismini emlashga qaror qildi. O‘smirlar Germaniyaning BioNTech biotexnologiya kompaniyasi va Amerikaning Pfizer kompaniyasi birgalikda ishlab chiqargan vaksina bilan emlanadi.

Sog‘liqni saqlash vazirligining ma’lumotlariga ko‘ra, ushbu qaror mazkur yosh guruhi uchun tanlangan preparat oziq-ovqat va farmatsevtika idorasi tasdig‘idan o‘tganidan so‘ng qabul qilingan.

Shu bilan birga, Ichki ishlar vazirligining rasmiy vakili podpolkovnik Talal ash-Shalxubning ta’kidlashicha, 1-avgustdan Saudiya Arabistoni hukumati emlanmaganlar uchun ishga kirish va turli tadbirlarni o‘tkazishni taqiqlaydi.

“Tijoriy, madaniy, ko‘ngilochar, sport, iqtisodiy, ilmiy, ijtimoiy va boshqa tadbirlarda qatnashadiganlar COVID-19’ga qarshi emlanishi shart”, — dedi rasmiy. Uning ta’kidlashicha, qoidabuzarlarga 40 ming Saudiya riyoli (10 ming dollardan ortiq) miqdorida jarima solinadi.

Indoneziyada o‘tgan bir kecha-kunduzda 21 mingdan ortiq kishida COVID-19 qayd etildi, bu mamlakat uchun yangi antirekord. Mamlakatda pandemiya boshidan beri jami 2,1 milliondan ortiq kishida infeksiya aniqlangan, 57 138 bemor COVID-19 oqibatida vafot etgan. Shu bilan birga, haqiqiy raqamlar ancha yuqori deb hisoblanmoqda, chunki COVID-testlarning kichik ko‘lami tufayli Indoneziyada virus yuqtirish bo‘yicha ko‘plab holatlar rasmiy statistikaga kiritilmagan.

Indoneziya hukumati kasallanish holatining ortishi fonida kasalxonalar bemorlar oqimiga ortiq dosh berolmasligidan xavotirda. Shu bilan birga, mahalliy mutaxassislar koronavirusning ushbu to‘lqini ikki-uch hafta ichida cho‘qqisiga chiqishi mumkinligini aytmoqda

Janubiy Afrika Respublikasi(JAR)da koronavirusining yangi — delta turi tarqalishi sababli karantin choralari kuchaytirildi, mamlakat to‘rtinchi darajali xavf hududiga aylanmoqda.

“Barcha yig‘inlar — xoh ochiq, xoh yopiq joyda bo‘lmasin, taqiqlanadi. Bu diniy, siyosiy, madaniy va ijtimoiy uchrashuvlarni ham o‘z ichiga oladi ”, — dedi mamlakat prezidenti Siril Ramafosa.

Mamlakat bo‘ylab dafn marosimida qatnashuvchilar soni 50 kishigacha etib cheklanadi. Shu bilan birga, dafn marosimidan keyingi har qanday yig‘in taqiqlanadi. Barcha ish beruvchilar, agar ish joyida bo‘lishning hojati bo‘lmasa, o‘z xodimlariga uydan ishlashga ruxsat berishi kerak. Ishdan tashqarida faqat oila a’zolari bilan uchrashish mumkin bo‘ladi.

Restoran va boshqa ovqatlanish korxonalari faqat olib ketish yoki yetkazib berish uchun ishlashi mumkin. Bundan tashqari, mamlakatda soat 21:00 dan 04:00 gacha komendantlik soati joriy etilgan. Faqat tegishli ruxsatnomaga ega bo‘lgan xodimlar bu vaqtda ko‘chaga chiqishi mumkin. Spirtli ichimliklarni sotish taqiqlanadi.

Ushbu tadbirlarning barchasi 28-iyundan 11-iyulgacha amal qiladi. Bundan tashqari, 30-iyundan boshlab mamlakatdagi barcha maktablar yopiladi.