O‘zbekistonda qator imtiyozlarni taqdim etuvchi “Jismoniy tayyorgarlik darajasi” ko‘krak nishoni ta’sis etiladi

O‘zbekiston Prezidentining “Aholining jismoniy tayyorgarlik darajasini baholash tizimini joriy etishning tashkiliy chora-tadbirlari to‘g‘risida”gi qarori bilan Turizm va sport vazirligining sport sinovlarini muvaffaqiyatli topshirgan shaxslar uchun “Jismoniy tayyorgarlik darajasi” ko‘krak nishonini ta’sis etish to‘g‘risidagi taklifi ma’qullandi, deb xabar beradi “Xalq so‘zi Onlayn”.

Bunda sport sinovlarining maxsus talablarini bajargan g‘oliblar I, II va III darajali ko‘krak nishonlari bilan taqdirlanadi.

Baholash tizimi bo‘yicha yosh ko‘rsatkichlaridan kelib chiqib sport sinovlarining maxsus talablarini muvaffaqiyatli bajargan shaxslar bir yil mobaynida quyidagi imtiyozlar va rag‘batlantirishlardan foydalanadi:

• safarbarlik chaqiruvi rezervidagi harbiy xizmat to‘lovining 50 foizini chegirma bilan to‘laydi va muddatli harbiy xizmatga birinchilar qatorida ustunlik bilan yuboriladi;
• maxsus talablarni bajargan g‘oliblarga (I o‘rin) “Temurbeklar maktabi”ga test sinovlarisiz tanlovdan tashqari o‘qishga kirishda;
• bepul tarzda davlat tuman (shahar) ko‘p tarmoqli tibbiyot muassasasida bir martalik chuqurlashtirilgan tibbiy ko‘rikdan o‘tadi;
• maxsus talablarni bajargan g‘oliblarga (I o‘rin) umumiy foydalanishdagi davlat yo‘lovchi tashish shahar transportida bepul hamda hududlararo harakatlanishda 50 foiz chegirmali to‘lov bilan imtiyozli yurish huquqi beriladi (taksi, shu jumladan, yo‘nalishli taksi mustasno);
• farzandlari yashayotgan joydagi umumta’lim maktabi, maktabgacha ta’lim tashkilotlari, shuningdek, yozgi sog‘lomlashtirish oromgohlariga navbatsiz joylashtiriladi;
• barcha davlat organlari va tashkilotlarining xodimlariga ish joyi hisobidan dam olish maskanlari va sanatoriylarga bepul yo‘llanmalar taqdim etiladi;
• respublika miqyosida ishga yoki o‘qishga qabul qilinishida jismoniy tayyorgarlik talab etiladigan imtihon (oliy ta’lim muassasalari sport yo‘nalishlaridan tashqari), sinov, amaliy mashg‘ulotlarda ustunlik (imtihonda maksimal ball yoki amaliy mashg‘ulotlardan ozod qilinishi) beriladi.

Ma’lumot uchun, so‘nggi 3—4 yil ichida O‘zbekistonda “Xalqlar do‘stligi”, “O‘zbekiston Yoshlar ittifoqi boshlang‘ich tashkiloti yetakchisi”, “Ma’naviy-ma’rifiy ishlar a’lochisi”, “Xalq ta’limi fidoyisi”, “Fuqarolik jamiyatini rivojlantirishga qo‘shgan hissasi uchun”, “Uy-joy kommunal xizmat ko‘rsatish a’lochisi”, “Mehnatkash dehqon”, “Ilg‘or fermer”, “Mahalla iftixori” kabi qator ko‘krak nishonlar ta’sis etildi.