Qoraqalpog‘istonning Kegayli tumanida fuqarolar yo‘lni to‘sib qo‘ydi, deya xabar bermoqda O‘zA.

Ma’lum qilinishicha, tuman Aholi bandligiga ko‘maklashish markazining hisobida mablag‘ bo‘lmaganligi bois, 2021-yilda ishsizlik nafaqasini olayotgan fuqarolarning aprel—may oylari uchun beriladigan nafaqa pullari kechikkan.

Shu tufayli 20 nafar fuqaro norozilik namoyishi uyushtirgan.

Muammo tegishli mas’ullar tomonidan bartaraf qilinib, jami 218 fuqaroning umumiy 120 million 330 ming so‘m miqdoridagi ishsizlik nafaqasi Kegayli tumani Xalq banki tomonidan to‘lab berilgan.

Bundan avval Navoiyda ikki shaxs tomonidan aldab ketilgan fuqarolar yo‘lni to‘sib, namoyish o‘tkazgani, Jizzaxda yuk ortish talablarini buzgan haydovchilar norozilik bildirib, xalqaro yo‘lni to‘sib qo‘ygani hamda Chiroqchida hokim va’dasini bajarmagani uchun “Afrosiyob” poyezd yo‘li to‘sib qo‘yilgani haqida xabar berilgandi.