Namanganda tadbirkor tuman hokimligi binosi oldiga 100 ga yaqin qo‘yni haydab kelgani haqida xabar berilgandi. Namangan viloyati IIB matbuot xizmati xabar qilishicha, qo‘ylarni hokimlikka boshlab borgan shaxsga nisbatan chora ko‘rilgan.
Qayd etilishicha, 2021-yil 18-iyun kuni jinoyat ishlari bo‘yicha Yangiqo‘rg‘on tuman sudining ochiq sud majlisida tuman hokimligi binosi oldiga qo‘ylarini olib kelgan fuqaroga nisbatan Ma’muriy javobgarlik to‘g‘risidagi kodeksning 54-moddasi 1-qismi (epidemiyalarga qarshi kurash qoidalarini buzish), 104-moddasi 1-qismi (ekinzorlarni payhon qilish, qishloq xo‘jalik ekinlarining dalada to‘plab qo‘yilgan hosiliga zarar yetkazish yoki uni yo‘q qilib yuborish, ko‘chatlarga shikast yetkazish), 161-moddasi (shaharlarni va boshqa aholi punktlari obodonlashtirish qoidalarini buzish), 183-moddasi (mayda bezorilik) va 194-moddasining 1-qismida (ichki ishlar organlari xodimining qonuniy talablarini bajarmaslik) nazarda tutilgan huquqbuzarliklarni sodir etgan deb topildi.
Unga Ma’muriy javobgarlik to‘g‘risidagi kodeksning 54-moddasi 1-qismi bilan, ya’ni bazaviy hisoblashning 5 baravari miqdoridagi jarima jazosi, Ma’muriy javobgarlik to‘g‘risidagi kodeksning 104-moddasining 1-qismi va 161-moddasi bilan bazaviy hisoblash miqdorining 3 baravari miqdoridagi jarima jazosi, Ma’muriy javobgarlik to‘g‘risidagi kodeksning 183-moddasi bilan 10 sutka ma’muriy qamoq jazosi, Ma’muriy javobgarlik to‘g‘risidagi kodeksning 194-moddasining 1-qismi bilan bazaviy hisoblashning 1 baravari miqdoridagi jarima jazosi tayinlandi.
Izoh (0)