Zarruh Adashevning bekor bo‘lgan jangi, “Real”dagi 117 yillik rekord, sobiq jamoasiga qaytgan 43 yoshli Buffon va boshlamasdan tugatgan Gattuzo. Eng so‘nggi sport yangiliklari

Dunyo va o‘zbek sportiga oid 17-iyun kunining muhim xabarlari dayjesti bilan tanishing.

Eriksenning yuragiga moslama o‘rnatiladi

“Inter” klubi va Daniya terma jamoasi yarim himoyachisi Kristian Eriksenning yuragiga kardioverter-defibrillyator o‘rnatiladi. Finlyandiyaga qarshi o‘yinda yurak bilan bog‘liq muammodan boshdan kechirgan futbolchi daniyalik va xalqaro mutaxassislar tavsiyasi bilan shu qarorga kelgan.

Kardioverter-defibrillyator — hayotga xavf soladigan aritmiya va yurak to‘xtab qolishini oldini olishga mo‘ljallangan moslama. U bemorning ko‘krak qismiga implantatsiya qilinadi.

Ramos bilan xayrlashgan “Real” Varan bilan yangi shartnoma imzolashga yaqin

“Real” markaziy himoyachisi Rafael Varan katta ehtimol bilan madridliklar safida qoladi. “Qaymoqranglilar” shartnomani uzaytirish borasida 28 yoshli futbolchi bilan deyarli kelishuvga erishgan.

Fransiyalik futbolchining “Real” bilan amaldagi shartnomasi 2022-yilning yoziga qadar mo‘ljallangan. Avvalroq Madrid klubi Varanni kelasi yozda tekinga qo‘yib yubormaslik uchun 2021-yilgi yozgi transfer oynasida sotishga tayyorligi xabar qilingandi.

“Real”da 117 yildan beri kuzatilmagan holat

Ramos ketganidan keyin “Real”ning asosiy sardori Marselo bo‘ladi. Uning o‘rinbosarlari fransuzlar — Karim Benzema va Rafael Varan bo‘ladi. Shu tariqa 1904-yildan beri ilk bor ispaniyalik bo‘lmagan futbolchi “Real” sardoriga aylanadi.

Transfer yangiliklari

“PSJ” “Inter” himoyachisi Ashraf Hakimi transferi ustida ishlamoqda. Parijliklar 22 yoshli marokashlik futbolchi uchun 60 million yevro taklif qilmoqda, biroq milanliklar 75 milliondan kamiga rozi bo‘lmoqchi emas. “PSJ” Ashrafning o‘ziga yillik 8 million yevro (qo‘shimcha 2 mln bonus) maoshga 5 yillik shartnoma taklif qilmoqda. Futbolchiga “Chelsi”dan ham qiziqish bor, biroq londonliklar o‘yinchi almashish yoki narxni tushirishni istamoqda.

Buffon “Parma”ga qaytdi

“Yuventus” bilan amaldagi shartnomasi nihoyasiga yetgan Janluiji Buffon 20 yillik tanaffusdan keyin sobiq jamoasi safiga qaytdi. B Seriyaga tushib ketgan klub bu haqda rasman e’lon qildi. Buffon bu orqali muntazam o‘yin amaliyotiga ega bo‘lmoqchi va Italiya bilan JCh—2022 ga borish istagida. Avvalroq Buffon bu maqsad yo‘lida “Barselona”ning zaxira darvozaboni sifatida o‘ynash variantidan voz kechgandi.

Gattuzo boshlamasdan tugatdi

May oyida “Napoli”ni tark etib, “Fiorentina” bosh murabbiyiga aylangan Jennaro Gattuzo florensiyaliklar klubini ham tark etdi. Qayd etilishicha, mutaxassisning qarashlari rahbariyatniki bilan mos kelmagan. Nikolo Skiraga ko‘ra, 43 yoshli mutaxassis “Tottenhem” bosh murabbiyiga aylanadi. Tomonlar kelishuvga erishgani xabar qilinmoqda.

MMA

Usmon Nurmagomedov Bellator 263 da jang qiladi. UFC sobiq chempioni Habib Nurmagomedovning amakivachchasi Bellator’dagi ikkinchi jangini o‘tkazadi. Unga AQSh vakili Menni Muro raqib bo‘ladi. Jang 31-iyul kuni bo‘lib o‘tadi.

Zarruh Adashevning navbatdagi jangi bekor qilindi. UFC mutlaq yengil divizionida harakat qilayotgan Zarruhning Xuankamilo Ronderosga qarshi jang ham bekor qilindi. Adashevning aytishicha, raqib noma’lum sababga ko‘ra jangdan bosh tortgan. Mazkur to‘qnashuv 31-iyul sanasiga belgilangandi. Shu tariqa 5 hafta ichida Adashevning ketma-ket ikkita jangi bekor qilindi. May oyida uning Rayan Benua qarshi jangi bekor bo‘lgandi.

Tennis

“Ulkan toj” tasnifidagi musobaqalarning 20 karra g‘olibi Rafael Nadal Angliya o‘tadigan Uimbldon musobaqasi va Tokio—2020 Olimpiadasini o‘tkazib yuboradi. Bu haqda sportchining o‘zi ma’lum qildi. Avvalroq ispaniyalik tennischi Rolan Garros musobaqasida Novak Jokovichga mag‘lub bo‘lib, musobaqani tark etgandi.

Rolan Garros va Uimbldon musobaqalari orasidagi tanaffus ikki haftani tashkil qiladi.

Olimpiadada muxlislar bo‘ladi

Yaponiya hukumati Olimpiya o‘yinlarida sport musobaqalariga 10 minggacha tomoshabin kiritilishiga ruxsat berishni reja qilmoqda. Bu haqda hukumatdagi manbasiga tayanib, Kyodo xabar qilmoqda. Yakuniy qaror Olimpiada ijroqo‘mi, Tokio shahri rahbariyati, XOQ va XPQ muhokamasidan o‘tganidan keyin qabul qilinadi.

Eslatib o‘tamiz, 2021-yilning 23-iyulidan 8-avgustiga qadar o‘tkaziladigan Olimpiada chet ellik muxlislarsiz o‘tadi. Musobaqalarga faqat mahalliy muxlislar kirishi mumkin bo‘ladi.