Toshkent bozorlarida narxlar barqarorligini ta’minlovchi elektron tizim ishga tushadi

Iqtisodiy taraqqiyot va kambag‘allikni qisqartirish vazirligining ma’lum qilishicha, poytaxt bozorlarida narxlar barqarorligini ta’minlovchi elektron tizim ishga tushadi.

Mazkur qaror bosh vazir o‘rinbosari – iqtisodiy taraqqiyot vaziri Jamshid Qo‘chqorov rahbarligida ichki iste’mol bozoriga meva-sabzavot va go‘sht mahsulotlarini uzluksiz yetkazib berish yuzasidan fermer xo‘jaliklari, eksportyorlar, dehqon bozorlari rahbarlarining takliflari bilan o‘rtoqlashish maqsadida o‘tkazilgan ochiq davra suhbatida qabul qilingan.

Ma’lumotlarga ko‘ra, ichki va tashqi bozorni meva-sabzavot hamda go‘sht mahsulotlari bilan barqaror ta’minlashda eng asosiy muammo bu ishlab chiqaruvchilar va xaridorlar o‘rtasida onlayn ma’lumot almashuvining mavjud emasligi. Shuningdek, ichki iste’mol bozorida talab va taklif o‘rtasida muvozanatni saqlash, mahsulot yetishtiruvchi va xaridorlarni ulgurji bozorlarda kunlik shakllanayotgan narxlar bilan doimiy xabardor qilib borish bo‘yicha yangicha tizim yaratish va amaliyotga joriy etish yuzasidan takliflar bildirilgan.

Berilgan takliflardan kelib chiqib, bir oy muddatda Toshkent shahridagi “Toshkent qishloq xo‘jaligi mahsulotlari ulgurji bozori” hamda “Eski Jo‘va dehqon bozori” aksiyadorlik jamiyatlarida tajriba tariqasida bozor hududiga kunlik kirib kelgan meva-sabzavot va go‘sht mahsulotlari turi, miqdori, ularning eng quyi va eng yuqori narxi hamda qaysi hududdan olib kelinganini o‘z ichiga olgan dasturiy ta’minot ishlab chiqilishi belgilangan.

Ishlab chiqilgan dasturiy ta’minot orqali bozor hududiga kunlik kelgan meva-sabzavot va go‘sht mahsulotlari turi, miqdori, ularning narxi to‘g‘risidagi ma’lumotlar ommaviy axborot vositalarida doimiy e’lon qilib boriladi.

Meva-sabzavot va go‘sht mahsulotlari narxlarining ko‘tarilishi va unga ta’sir etgan omillar haqida Davlat statistika qo‘mitasida doimiy brifing o‘tkazib borilishi yo‘lga qo‘yiladi.

Avvalroq Prognozlash va makroiqtisodiy tadqiqotlar instituti Price Warnings loyihasi doirasida Toshkent bozorlaridagi oziq-ovqat mahsulotlari narxlarini o‘rganib, boshqa mamlakatlar poytaxtlaridagi narxlar bilan solishtirgandi. O‘rganishlar natijasida Toshkentda ayrim mahsulotlar Yevropa poytaxtlaridan ham qimmatroq ekani aniqlangan.