“Bizda kimnidir o‘ldirish odati yo‘q”. Vladimir Putinning NBC News’ga bergan intervyusidan asosiy ma’lumotlar

Jenevada bo‘lib o‘tadigan Rossiya—Amerika sammiti arafasida Rossiya prezidenti Vladimir Putin Kremlda NBC News jurnalisti Kir Simmonsga intervyu berdi. Amerika telekanali suhbatning ingliz tilidagi versiyasini 14-iyun kuni e’lon qildi. Keyinchalik Kreml veb-saytida rus tilidagi stenogramma paydo bo‘ldi. Meduza Rossiya prezidentining intervyusidagi asosiy mavzularni chop etdi.

Aleksey Navalniy haqida

Putin siyosiy raqibini yo‘q qilishga buyruq berganini rad etdi. “Bizda kimnidir o‘ldirish odati yo‘q”, — dedi prezident. Shu bilan birga, u hozir hibsda bo‘lgan Navalniyning qamoqdan sog‘-salomat ozod qilinishiga ham kafolat bermadi.

“Quloq soling, bizning mamlakatda ozod qilish yoki ozod qilmaslik to‘g‘risidagi qarorlarni prezident emas, sud qabul qiladi. Qamoqda Navalniyga hech kim boshqalarga nisbatan yomonroq munosabatda bo‘lmaydi”, — deya qo‘shimcha qildi Putin.

“Uning ismi Aleksey Navalniy”, — sharhladi NBC jurnalisti. “Siz uni qamoqdan chiqadi deb aytishga tayyor emasmisiz?”

“Bu muhim emas. Uni qanday ma’qul ko‘rsangiz, shunday atashingiz mumkin, u qamoqdagi odamlardan biri, xolos”, — deb javob qildi Putin.

AQSh saylovlariga aralashish haqida

Putin Rossiya xakerlariga va Rossiya hukumatiga Amerika saylovlariga aralashish bo‘yicha qo‘yilgan ayblovlarni “tuganmas masxarabozlik” deb atadi.

“Bizni dunyodagi hamma narsada ayblashgan. Saylovlarga aralashish, kiberhujumlar va hokazolar. Ammo hech kim hech qachon biror dalil-isbot keltirish tashvishini qilmagan. Faqatgina asossiz ayblovlar”, — dedi Rossiya Federatsiyasi prezidenti. “Black Lives Matter harakatini qo‘zg‘atishda haligacha ayblanmay kelayotganimizga hayronman. Bunday asossiz ayblovlar bo‘yicha sizga birgina javob bera olaman: Xalqaro jinsiy islohotlar ligasiga shikoyat qilishingiz mumkin. Shunga rozimisiz?” — deya qo‘shimcha qildi Putin.

AQSh bilan hamkorlik haqida

Putin kiberjinoyatchilikka qarshi kurashda Moskva va Vashington kuchlarni birlashtirishi mumkinligiga umid qilmoqda. “Bu jarayonni AQShdagi sheriklarimiz bilan boshlashimizga katta umidimiz bor”, — deydi u.

Bundan tashqari, Putin Bayden bilan mahbuslarni ayirboshlash masalasini muhokama qilishga tayyorligini aytdi. “Bilaman, bizning qamoqxonalarda AQSh fuqarolari bor, ammo AQSh qamoqxonasida qanchadan qancha Rossiya fuqarolari borligini ko‘rsangiz edi, ular sanoqsiz”, — dedi u. Shuningdek, uning so‘zlariga ko‘ra, Rossiya agar amerikalik hamkorlari bosh tortmasa, kosmik sohada AQSh bilan hamkorlikni davom ettiradi. Rossiya rahbarining fikricha, Moskva va Vashington o‘rtasidagi munosabatlarda so‘nggi yillarda oldindan ko‘ra bilish va barqarorlik yetishmayapti.

Kapitoliyga hujum haqida

Putinning ta’kidlashicha, Rossiya boshqacha fikrlaganlarga bosim o‘tkazishda ayblanmoqda, ammo AQShning o‘zi o‘z fuqarolarini siyosiy qarashlari uchun ta’qib qilmoqda. Bunga misol sifatida u Tramp tarafdorlarining Kapitoliyga bostirib kirishi voqeasini keltirdi. “Bizda bir maqol bor: yuzing qiyshiq bo‘lsa, oynadan o‘pkalama. Buni sizga shaxsan hech qanday aloqasi yo‘q, lekin kimdir sizni biror nimada ayblasa, o‘zingizga razm solasiz, oynada bizni emas, o‘zingizni ko‘rasiz. Bu yerda g‘ayrioddiy hech narsa yo‘q”, — dedi prezident.

“Qani ayting-chi, siz Kongressga kirgan va politsiya xodimi tomonidan o‘qqa tutilgan ayolni o‘ldirishni buyurganmidingiz? Kongressga bostirib kirganlarning 450 nafari hibsga olinganini bilasizmi? Ular binoga kompyuter o‘g‘irlash uchun kelmagan edi, ular siyosiy talablar bilan kelgan”, — dedi Putin jurnalistga.

Bayden haqida

Putin 2011-yilda Bayden bilan uchrashuvda uning Rossiya rahbarida “qalb yetishmaydi” degan so‘zlarini eslay olmasligini aytdi. U Qo‘shma Shtatlarning amaldagi prezidentini birga ishlash mumkin bo‘lgan professional sifatida tavsifladi. “U deyarli butun hayotini siyosat ichida o‘tkazdi”, — dedi Putin.

Tramp haqida

Putin Amerikaning sobiq rahbarini “ajoyib, iste’dodli va yorqin shaxs” deb atadi. “Aks holda, u AQSh prezidenti bo‘la olmasdi. U kimgadir yoqishi, kimgadir yoqmasligi mumkin”, — dedi Putin.

Putin qotilmi?

NBC News jurnalistining mazkur savoliga Putin shunday javob berdi: “Ishim davomida men juda ko‘p sabablarga ko‘ra turli darajadagi va har xil yo‘nalishdagi hujumlarga odatlanib qolganman. Bu meni ajablantirmaydi. Men o‘nlab bunday ayblovlarni eshitganman”.

Putin hukmronligi yillarida Rossiyada o‘ldirilgan odamlarning nomlari keltirilgan ro‘yxat haqidagi savolga u shunday javob berdi: “Bilasizmi, qo‘pol gapirishni istamasdim, lekin bu qandaydir tarzda oshqozon og‘rig‘iga o‘xshaydi, faqat og‘zaki shakldagi”.

Voris haqida

Putin “qachondir boshqa bir odam, albatta, mening o‘rnimni egallaydi” — deya ta’kidladi. “Agar mening faoliyatimga tanqidiy yondashsa ham, biror insonni vatanga sodiqligini, vatan uchun nafaqat yillar, balki butun hayotini fido qilishga tayyorligini ko‘rsam, u menga qanday munosabatda bo‘lishidan qat’i nazar, bunday insonlarni qo‘llab- quvvatlash uchun hamma narsani qilaman”, — dedi Rossiya prezidenti.