Toshkent viloyati Olmaliq shahrida joylashgan “Ammofos-Maksam” aksiyadorlik jamiyatida ko‘p yillardan buyon ishlab kelgan ayollar sababsiz ishdan bo‘shatilayotgani, korxona darvozasi oldida bir guruh ayollar to‘planib turgani aks etgan video ijtimoiy tarmoqlarda tarqaldi. “Ammofos-Maksam” videoda ishchilarning hech biri bilan mehnat munosabatlari to‘xtatilmaganini ma’lum qildi. Holat Xalq deputatlari Olmaliq shahar kengashi deputatlari hamda XDP shahar kengashi raisidan iborat ishchi guruh tomonidan ham o‘rganildi.

Foto: Videodan kadr

Aniqlanishicha, “Ammofos-Maksam” AJ bilan jami 99 nafar xodim kasanachi sifatida shartnoma tuzib, ishlab kelgan. Ular korxonaga qarashli bo‘lgan oshxona uchun qishloq xo‘jaligi mahsulotlarini yetishtirib bergan. 2021-yil 1-martdan oshxonalar autsorsing shartlari asosida mazkur faoliyat bilan shug‘ullanuvchi kompaniyaga berilgan. G‘olib kompaniya esa zarur bo‘lgan mahsulotlarni uzoq muddatli shartnomalar asosida o‘z yetkazib beruvchilaridan sotib olishni afzal ko‘rgan.

Natijada jami 99 nafar kasanachini ish o‘rinlarini qisqartirishga to‘g‘ri kelgan. Ulardan 47 nafari Olmaliq shahrida doimiy ro‘yxatdan o‘tgan. Korxonaning xodimlar boshqarmasi boshlig‘i Barno Mirsaidova bergan axborotga ko‘ra, 99 nafar kasanachidan 28 nafar ayollar tug‘ruq ta’tilida bo‘lganligi sababli bu qisqartirishga uchramasligi ta’kidlandi. Qolgan 71 nafar kasanachi qisqartirish bo‘yicha mehnat qonunchiligiga asosan, rasmiy ogohlantirilgan bo‘lib, ulardan 12 nafari ogohlantirish xatlariga o‘z roziligi bilan imzo chekkan. Qolgan 59 nafar kasanachi korxona tomonidan qisqartirilish holatiga rozilik bildirmagan.

“Ammofos-Maksam” AJning boshqaruv raisi o‘rinbosari Jo‘ra Yusupovning ta’kidlashicha, hozirgi holatga ko‘ra, yuqorida qayd etilgan barcha kasanachilar “Ammofos-Maksam”dan hali ishdan bo‘shatilmagan. Ular bilan tuzilgan mehnat shartnomasi o‘z kuchida. Berilgan ogohlantirish davrida Mehnat kodeksida belgilangan tartibda o‘rtacha oylik ish haqi va boshqa imtiyozlar saqlanib qolingan.

Korxona rahbariyati tomonidan ish o‘rinlari qisqartirilayotgan kasanachilarga tushuntirish ishlari olib borilganligi ta’kidlandi. Korxona yetakchi yurist-konsultanti Ulug‘bek Ergashev va kasaba uyushmasi raisi Nodir Tog‘ayevlarning ta’kidlashicha, xodimlarning qisqartirilishi bilan bog‘liq barcha jarayonlar belgilangan qonun doirasida amalga oshirilmoqda.

“Deputatlar tomonidan bildirilgan fikrlarga ko‘ra, xo‘jalik yurituvchi subyekt sifatida korxona o‘z iqtisodiy manfaatlarini, eng avvalo iqtisodiy foydani ko‘zlashi tabiiy. Shunday bo‘lsa-da bizningcha, korxona qisqartirishga tushgan kasanachilarning mutaxassisligi va imkoniyatlarini chuqur tahlil qilgan holda korxonaning yaqin kelajakdagi ishchilarga bo‘lgan ehtiyojini prognoz qilishi va imkon qadar mana shu kasanachilarni boshqa doimiy ishga qabul qilish masalasini ko‘rib chiqishi kerak”, — deyiladi XDP deputatlik guruhida.

Shuningdek, ma’lum qilinishicha, 11-iyun kuni Olmaliq shahar hokimligida shahar hokimi, xalq deputatlari Olmaliq shahar kengashi rahbari, deputatlar, sektor rahbarlari, “Ammafos-Maksam” AJ mutasaddilari, huquqshunoslar va boshqa mas’ullar hamda qisqartirishga tushgan kasanachilar ishtirokida muloqot tashkil etilgan. Yig‘ilishda har bir ayolning murojaatlari tinglanib, “Ammofos-Maksam” mas’ullari ham holat yuzasidan tushuntirish berib o‘tgan.

Avvalroq Olmaliq kon-metallurgiya kombinati (OKMK)ga ishga joylashish masalasi sabab bir guruh ayollar shahardagi yo‘lning qatnov qismi to‘sib qo‘ygandi. Holatni o‘rganib chiqqan Bandlik va mehnat munosabatlari vazirligi rasmiy bayonot bergandi.