AQSh prezidenti Jo Bayden 9-iyun kuni Xitoyning TikTok va WeChat servislariga qo‘yilgan cheklovlarni bekor qilish to‘g‘risidagi farmonni imzoladi. Bu haqda Oq uy matbuot xizmatiga tayanib “RBK” xabar berdi.

Foto: AP Photo

Gap 2020-yilning avgustida sobiq davlat rahbari Donald Tramp tomonidan imzolangan farmonlarni bekor qilish haqida ketmoqda. Farmonlar orqali TikTok videoxizmati va WeChat messenjeriga egalik qiluvchi Xitoyning ByteDance va Tencent kompaniyalariga cheklovlar qo‘yilgandi.

Trampning farmonlariga muvofiq amerikaliklarga ushbu kompaniyalar bilan biror ish olib borish va ulardan reklama sotib olish taqiqlangan. Ushbu taqiqni buzgan AQSh fuqarolari jarimaga tortilishi mumkin edi.

Tramp ma’muriyatining harakatlari Xitoyga qarshi sanksiyalar siyosati doirasida amalga oshirilgan. Tramp Xitoy dasturlari XXR rasmiylari bilan aloqada ekani va razvedka idoralariga amerikalik foydalanuvchilarning shaxsiy ma’lumotlarini to‘plashga yordam berishini ta’kidlagan. Bu o‘z navbatida, Pekinga federal xodimlarning harakatlarini kuzatib borish, korporativ josuslik qilish, amerikaliklarga nisbatan shantaj va shu orqali milliy xavfsizlikka tahdid solish imkonini ham yaratadi.

Tramp tomonidan TikTok va WeChat’ga qo‘yilgan cheklovlar o‘rniga Bayden AQSh Savdo vazirligini Vashingtonning potensial raqiblariga aloqador bo‘lgan hamda Amerika manfaatlariga tahdid solishi mumkin bo‘lgan xorijiy mobil dasturlarni sinchkovlik bilan tekshirishga majbur qiladigan yangi hujjatni imzoladi.

3-iyun kuni esa Bayden amerikaliklarga Xitoyning 59 ta kompaniyasi aksiyalarini sotib olishni taqiqlagan edi. Ular orasida dunyodagi eng yirik telekommunikatsion kompaniyalardan Huawei, China Mobile Communications Group Co., Ltd., China Telecommunications Corporation va boshqa aloqa korxonalari bor.

Baydenning ushbu farmoni undan oldingi prezident Donald Tramp davrida qabul qilingan choralarni to‘ldiradi. 2021-yilning yanvar oyi boshida Donald Tramp administratsiyasi Xitoyning 10 ta kompaniyasini “qora ro‘yxat”ga kirgizgan.

Mavzuga doir: