O‘zbekiston Respublikasi Energetika vazirligi tomonidan Eriell Group bilan hamkorlikda Xalqaro bolalarni himoya qilish kuni munosabati bilan Super Leo xayriya loyihasi ishga tushirildi. Loyiha Yer resurslariga ehtiyotkorlik bilan munosabatda bo‘lish tuyg‘usini shakllantirishga xizmat qiladi, shuningdek, bolalar va ularning ota-onalarini energiya va resurs samaradorligi bilan tanishtirishga xizmat qiladi.
Loyiha doirasida maktabgacha va kichik maktab yoshidagi bolalar uchun maxsus 10 ming nusxadagi kitoblar chop etilib, unda sher bolasi Leo va uning oilasi oson, qiziqarli shaklda energiya tejamkorligi to‘g‘risida so‘zlab beradi.
Maktabgacha yoshdagi bolalar ilk Super Leo kitoblarini 1-iyun kuni, Toshkent shahridagi 74-sonli “Sevinch” bolalar bog‘chasida bo‘lib o‘tgan bayram tadbirida olishdi. Energiya tejamkorligi to‘g‘risidagi qiziqarli hikoyalarni bolajonlarga ertak qahramonlarining o‘zi, ya’ni sher bolasi Leo hamda uning mehribon va dono dadasi Sherxon topshirdi. Bolalar bog‘chasining 250 nafar tarbiyalanuvchisi uchun Eriell Group tomonidan furshet hamda animatorlar va ertak qahramonlari ishtirokida ko‘ngilochar dastur tashkil etildi.
Maktabgacha yoshdagi bolalar uchun ekologik ta’lim erta yoshdan tabiat va atrof-muhitni tushunish, unga hurmat bilan munosabatda bo‘lish va asrab-avaylashga yordam beradi. Ular global iqlim o‘zgarishi sharoitida energiya va resurs tejamkorligi singari tushunchalarning mazmun-mohiyatini anglab yetadi. Tabiiy resurslarga ehtiyotkorona munosabatni bolalik chog‘idanoq shakllantirish juda muhim. Ertakni yaratish jarayonida aynan shu jihat Dinara&Co nashriyot uyi va media kompaniyasi jamoasi rahbarligidagi kitob mualliflari hamda illyustratsiyalar yaratuvchilarini ilhomlantirdi.
Ertakda mitti sher bolasining haqiqiy super qahramonga aylanishi ko‘rsatib berilgan. Bunga foydali bilimlar turtki bo‘ladi. Leo va u singari ko‘plab bolajonlar uchun qanday qilib super qahramonga aylanish va sayyoramizni saqlab qolish mumkinligini bilish muhim edi. Sayyoramizning holati, energiya sarfi uning uyidagi elektr chirog‘iga bog‘liq ekanligi uning xayoliga ham kelmagan. Bu haqida unga otasi so‘zlab beradi. Leo u va boshqalar energiyani qanchalik iqtisod qilsa, sayyoramiz resurslari shunchalik tejab ishlatilishi haqida bilib oladi.
Yangi kitob qahramoni ko‘plab ma’lumotlarga ega bo‘ladi va bunda jajji o‘quvchilarga ham yordam beradi. Bolajonlar uchun mo‘ljallangan yangi kitob maktabgacha ta’lim muassasalariga yetkazib beriladi va bolajonlarning yanada bilimli va mas’uliyatli bo‘lib voyaga yetishiga xizmat qiladi. Hikoyalardan tashqari, kitobdan bolajonlar uchun qiziqarli topshiriqlar joy olgan bo‘lib, ular kattalar yordamida olingan bilimlarni mustahkamlashga yordam beradi.
Kitob taqdimotidan so‘ng bolalar bog‘chasida ertak qahramonlari O‘zbekiston Energetika vazirligi va Eriell Group vakillari bilan birga, Milliy bolalar tibbiyot markaziga yo‘l olishdi. Bu yerda “Yuksalish” umummilliy harakati va “Ezgu amal” jamoat tashkiloti hamkorligida tashkil etilgan marafon doirasida onkologik kasallikka chalingan bolalar uchun bayram tashkillashtirildi. Animatsiya qahramonlari jajji bemorlar bilan muloqotda bo‘ldi, ularga esdalik sovg‘alari va o‘yinchoqlarni sovg‘a qilishdi. Eriell Group og‘ir bemor bolakaylarga umumiy miqdori 50 million so‘mlik yordam ko‘rsatdi. Bu mablag‘ga zarur dori-darmonlar, tibbiy uskunalar xarid qilindi hamda gemato-onkologiya bo‘limida bolalar xonasi jihozlandi.
Super Leo – energiya samaradorligi haqidagi bilimlarni tarqatishga yo‘naltirilgan xayriya loyihasi. Ertak qahramonining hikoyasi shaklida o‘qitish qiziqarli bo‘ladi. O‘zbekiston Energetika vazirligi va Eriell Group respublika viloyatlarida ushbu loyihani davom ettiradi. Har kim tashkilotchilarning quyidagi saytida kitobning elektron shakli bilan tanishishi mumkin: https://www.eriell.com/, http://minenergy.uz/ru
Tashkilotchilarning rasmiy sahifalari:
Instagram: minenergy.uz, eriell.group
Facebook: minenergyuz, EriellOfficial
Eriell Group matbuot xizmati
Izoh (0)