O‘zbekistonda may oyida inflyatsiya 0,5 foizni tashkil etdi. Bu haqda Davlat statistika qo‘mitasi ma’lumotlari guvohlik bermoqda.
Oziq-ovqat mahsulotlari 0,5 foizga, nooziq-ovqat mahsulotlari 0,4 foizga, xizmatlar 0,7 foizga qimmatladi. Yil boshidan buyon narxlar 4,6 foizga o‘sdi. Yanvar, fevral, mart oylarida ham inflyatsiya 1 foizdan past bo‘lgan, aprel oyida esa 1,5 foizni tashkil etgandi.
2017-yildan buyon birinchi bor, statistika ishonchli bo‘lganidan beri to‘rtinchi marta inflyatsiya 1 foizdan oshmadi. Markaziy bank 2021-yilda inflyatsiya 10 foiz atrofida bo‘lishini prognoz qilgandi.
Prezident Shavkat Mirziyoyev 29-dekabr kuni Oliy Majlisga yo‘llagan murojaatnomasida 2021-yilda narx-navo o‘sishini 10 foizdan oshirmaslik Markaziy bank va hukumatning asosiy vazifasi bo‘lishini aytgandi.
10 foiz — 2017-yildan buyon qayd etilgan eng past ko‘rsatkich. 2019-yil yakunlari bo‘yicha inflyatsiya 15,2 foizni, 2018-yilda 14,3 foizni, 2017-yilda 14,4 foizni tashkil etgan.
Spot’ning yozishicha, o‘nlab yillar davomida O‘zbekistonda inflyatsiya darajasi 3-5 foizni tashkil etgan, biroq ushbu raqamlar shubhali.
Izoh (0)