Bandlik va mehnat munosabatlari vaziri Nozim Husanov 23-may kuni “Toshkent 5 tashabbus harakati” yoshlar festivali doirasidagi uchrashuvda O‘zbekistondagi ishsizlik darajasiga oid savolga javob qaytardi. Bu haqda “Daryo” muxbiri xabar bermoqda.
“Koronavirus pandemiyasi tufayli o‘tgan yili ishsizlik ko‘paydi. Mehnatga layoqatli fuqarolarga nisbatan, uchinchi chorak natijalariga ko‘ra (2020-yil), bizning mamlakatda ishsizlik darajasi 15 foizni tashkil etdi. 2021-yilning birinchi choragi natijalariga ko‘ra 10,5 foiz. Tizimli ishlar bu borada salbiy ko‘rsatkichlarning pasayishiga yordam berdi. 2021-yilning birinchi choragi va 2020-yilning to‘rtinchi choragi davomida joylarda korxonalarni qayta tiklash bo‘yicha keng ko‘lamli tadbirlar o‘tkazildi. Ba’zi tadbirkorlarga zararlarini qoplashlari uchun kredit ta’tillari yoki muddatlarini uzaytirish hamda boshqa choralar ko‘rilgan.
Yaqinda yangi ish o‘rinlari yaratish dasturi tasdiqlandi, ularning soni 457 mingtani tashkil etadi. Bir necha yo‘nalishlarda — yangi investitsiya loyihalarini joriy etish, yangi mintaqaviy investitsiya loyihalarini amalga oshirish, yangi tadbirkorlik subyektlarini yaratish, shuningdek, ijtimoiy sohada ijtimoiy obyektlarni qurish orqali ham ish o‘rinlarini yaratish rejalashtirilgan. Bizning vazirlik jarayonni nazorat qiladi, monitoring olib boradi, barcha normalar va rejalarga rioya qilinishi bo‘yicha Vazirlar Mahkamasiga ma’lumot taqdim etadi”, — dedi vaziri Nozim Husanov.
Mavzuga doir:
Izoh (0)