Argentinada koronavirus sabab futbol musobaqalari to‘xtatildi. Yozda u yerda Kopa Amerika—2021 bo‘lib o‘tadi

Argentina futbol assotsiatsiyasi mamlakatda koronavirus bilan bog‘liq holat yomonlashgani sabab milliy chempionatlarni to‘xtatib turishga qaror qildi.

21-maydan 30-mayga qadar barcha futbol uchrashuvlari to‘xtatilgan. Ular qatorida Liga Kubogi (Maradona Kubogi) yarim final va finalidan o‘rin olgan bahslar ham bor.

Ayni vaqtda Libertadores Kubogi va Sudamerikana musobaqalari taqvimiga o‘zgartirish kiritish masalasi ko‘rib chiqilmayapti.

Avvalroq Argentina futbol bo‘yicha Amerika Kubogi—2021 musobaqasining yolg‘iz mezboniga aylangani ma’lum bo‘lgandi. Kolumbiya mamlakatdagi tartibsizlar sabab Kopa Amerika mezbonligidan mahrum bo‘lgandi.

Argentinada aprel-may oylarida COVID-19 ga chalinish holatlari ko‘paydi. Ayni vaqtda mamlakatda kuniga 35 mingdan ortiq kasallanish holati qayd etilmoqda. Argentinada koronavirus yuqtirib olganlar soni shu kunga qadar 3,5 millionga yaqinlashib qolgan.