Аргентина футбол ассоциацияси мамлакатда коронавирус билан боғлиқ ҳолат ёмонлашгани сабаб миллий чемпионатларни тўхтатиб туришга қарор қилди.
21 майдан 30 майга қадар барча футбол учрашувлари тўхтатилган. Улар қаторида Лига Кубоги (Марадона Кубоги) ярим финал ва финалидан ўрин олган баҳслар ҳам бор.
Айни вақтда Либертадорес Кубоги ва Судамерикана мусобақалари тақвимига ўзгартириш киритиш масаласи кўриб чиқилмаяпти.
Аввалроқ Аргентина футбол бўйича Америка Кубоги—2021 мусобақасининг ёлғиз мезбонига айлангани маълум бўлганди. Колумбия мамлакатдаги тартибсизлар сабаб Копа Америка мезбонлигидан маҳрум бўлганди.
Аргентинада апрель май ойларида COVID-19 га чалиниш ҳолатлари кўпайди. Айни вақтда мамлакатда кунига 35 мингдан ортиқ касалланиш ҳолати қайд этилмоқда. Аргентинада коронавирус юқтириб олганлар сони шу кунга қадар 3,5 миллионга яқинлашиб қолган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)