Falastin Isroil tomonidan o‘t ochishning to‘xtatilishini ma’qullaydi, ammo bu yetarli emas.  Bu haqda Falastin tashqi ishlar vaziri Riyod al-Malikiy BMT Bosh assambleyasining Isroil va Falastin masalalari bo‘yicha majlisida aytib o‘tdi.

Foto: AP Photo

“2 milliondan ortiq aholisi bor Falastin xalqi ertangi kuni yanada porloq bo‘lishini bilib, uyquga ketishi yaxshi. Ammo bu kam, umuman yetarli emas”, — dedi vazir.

Uning ta’kidlashicha, mojaro Quddusdagi musulmonlarning ahvoli hamda shaharning ba’zi joylaridan falastinlik oilalarni haydab chiqarishi bilan qo‘zg‘atilgan. Tashqi ishlar vaziri ushbu muammolarni hal qilish kerakligini ta’kidladi.

Vazirning aytishicha, Isroil shaharda birorta ham arabni qoldirmaslik uchun Sharqiy Quddusdan falastinlik oilalarni majburan chiqarib yuborishga urinmoqda.

Falastin vakili xalqaro hamjamiyatni mojaroni bir chekka shunchaki “tomosha qilib o‘tirmaslikka” chaqirdi. Uning fikriga ko‘ra, dunyodagi  har bir davlat Isroilni Falastin xalqiga qarshi qilgan xatti-harakatlari uchun javobgarlikka tortilishi uchun ma’sul.

Avvalroq Isroil xavfsizlik kabinetining a’zolari G‘azo sektori bilan sulh tuzish uchun ovoz bergan edi. HAMAS vakili Reuters agentligiga G‘azoda “o‘zaro va bir vaqtda” sulh 21-may, juma kuni kechasi Toshkent vaqti bilan soat 04:00da boshlanishini tasdiqlagan.

Falastin—Isroil nizosining 2014-yildan buyon kuzatilgan eng kuchli avj olishi may oyida Isroil hukumatining Quddusda bir qator arab oilalarini ko‘chirib yuborish qaroridan keyin boshlandi. Bu noroziliklarni keltirib chiqardi hamda Quddusda arab namoyishchilar va Isroil politsiyasi o‘rtasidagi to‘qnashuvlarga sabab bo‘ldi.

Vaziyatga HAMAS aralashdi. Isroil uning politsiyani olib ketish haqidagi talablarini bajarmaganidan keyin guruh raketalar otishni boshladi. Bunga javoban Isroil G‘azo sektorini o‘qqa tutdi.