Buxoro viloyatida yashovchi bola 2018-yil, 4 yoshida otasi tomonidan Rossiyaga olib ketilgach, oradan uch yil o‘tib onasi bag‘riga qaytarildi. Bu haqda “Daryo”ga MIB viloyat boshqarmasi mas’ul xodimi Anvar Salimov ma’lum qildi.

Ta’kidlanishicha, Romitan tumanida yashovchi fuqaro L.N. turmush o‘rtog‘i R.O. bilan o‘zaro kelishmovchilik sabab doimiy janjallashib kelgan. Shunga qaramasdan ayol 2018-yil 4 yoshli farzandi M.A.ni eri bilan birga bir yil muddatga Rossiyaga borishiga rozilik bergan. Biroq oradan ikki yil vaqt o‘tsa-da, ota farzandini xotiniga qaytarmagan.

Shundan so‘ng ayol Fuqarolik ishlari bo‘yicha Romitan tumanlararo sudiga murojaat qilgan. Sud esa besh yoshga to‘lgan M.A.ni onasi tarbiyasiga majburiy tartibda olib berish to‘g‘risida qaror chiqargan. Byuro ishga kirishgan.

Ijro harakatlari davomida ota farzandini onasi tarbiyasiga qaytarishi lozimligi haqidagi ogohlantirishlarga ham e’tibor bermay, qonuniy talablarga bo‘ysunmagan.

2021-yilda 7 yoshli M.A.ning 67 yoshli buvisi Ch.K. O‘zbekistonga qaytish uchun chipta xarid qilish maqsadida Rossiya aeroportlaridan biriga borgan. Bu jarayonda bojxona xizmati tomonidan M.A.ning qidiruvda ekani oydinlashgan va bola O‘zbekistonga qaytarilgan. Bola onasi bag‘riga sog‘-salomat qaytgan.