Qashqadaryo viloyatining Shahrisabz tumanida yashovchi alimentdan qarzdor ota qarzdorligini yopish va xorijga chiqishga ruxsat olish uchun minib yurgan Lacetti’sini xotiniga berdi. Bu haqda “Daryo”ga MIB viloyat boshqarmasi axborot xizmati rahbari Gulnoza Dilmurodova ma’lum qildi.

Ta’kidlanishicha, fuqarolik ishlari bo‘yicha Shahrisabz tumanlararo sudining 2017-yil 13-apreldagi qaroriga asosan, Shahrisabz tumani Shakarteri qishlog‘ida yashovchi F.X.dan mazkur tumandagi Avazmalik qishlog‘ida yashovchi undiruvchi M.X. foydasiga voyaga yetmagan bir nafar farzandi ta’minoti uchun oylik daromadining 1/4 miqdorida aliment undirish belgilangan.

“Aliment to‘lovlari o‘z vaqtida to‘lanmaganligi uchun qarzdorning O‘zbekistondan chetga chiqish huquqlari vaqtincha cheklangandi. Shu bois, qarzdor chetga chiqish cheklovini bekor qilish uchun farzandi 18 yoshga to‘lgunga qadar, ya’ni 2031-yil avgust oyigacha bo‘lgan aliment to‘lovlarini to‘liq to‘lab berish uchun haydab yurgan Lacetti avtomashinasini xotinining nomiga rasmiylashtirib berdi”, — deydi Gulnoza Dilmurodova.