O‘zbekistonda 2021-yil boshidan buyon Tashqi mehnat migratsiyasi agentligi tomonidan 9465 nafar fuqaro xorijiy davlatlarda ishga joylashtirildi. Bu haqda agentlik matbuot xizmati ma’lum qildi.
Qayd etilishicha, shundan 8034 nafari Rossiyaga, 1285 nafari Qozog‘istonga, 143 nafari Janubiy Koreyaga (mehnat shartnomalarini qayta tiklash hisobiga), 3 nafari BAAga yo‘l olgan.
Shuningdek, O‘zbekistondagi kasb-hunar markazlarida 13 ming 427 nafar fuqaro o‘qishga jalb qilingan.
Avvalroq chet elda boshpanasiz qolgan o‘zbekistonlik migrantlarga 300 dollar miqdorida moliyaviy yordam ko‘rsatilishi haqida xabar berilgan edi. Bundan tashqari, xorijdagi migrantlar uchun sug‘urta xizmati bepul amalga oshiriladi.
“Hozirda fuqarolarning chet elga ketishi uchun kasbiy va xorijiy bilim yetishmayapti. Bu ko‘plab fuqarolarimizning muammosi. Shu sababli mutlaqo ishsiz, ‘ayollar daftari’, ‘temir daftar’ga kiritilgan hamda shu kabi ijtimoiy yordam zarur bo‘lgan fuqarolar uchun bepul o‘qitish tizimlari yo‘lga qo‘yilgan. Xarajatlar Bandlik vazirligining sug‘urta jamg‘armasidan qoplab beriladi”, – degan edi bandlik va mehnat vazirligi birinchi o‘rinbosari Muhitdinov.
