Fuqarolik ishlari bo‘yicha G‘uzor tumanlararo sudining 2020-yil 6-martdagi ijro varaqasiga asosan qarzdor M.N.dan undiruvchi N.R. foydasiga voyaga yetmagan uch nafar farzandining moddiy ta’minoti uchun aliment undirish belgilangan. Bu haqda “Daryo”ga MIB viloyat boshqarmasi axborot xizmati rahbari Gulnoza Dilmurodova ma’lum qildi.

Ijro hujjati byuroning Dehqonobod tuman bo‘limiga kelib tushganidan so‘ng shu kunning o‘zida ijro ishini yuritish to‘g‘risida qaror qabul qilinib, taraflarga ma’lum qilingan. Biroq o‘tgan vaqt mobaynida qarzdor ota bir necha marotaba ogohlantirilgan bo‘lsa-da, aliment pullarini to‘lashdan qasddan bo‘yin tovlab kelgan.

Bo‘lim davlat ijrochisining aliment qarzini hisoblash qaroriga ko‘ra, M.N.ning qarzdorligi salkam 13 million so‘mga yetgan. Shu bois farzandlari ta’minotini o‘ylamagan mas’uliyatsiz otaga jinoyat ishlari bo‘yicha Dehqonobod tuman sudi tomonidan 15 sutka ma’muriy qamoq chorasi qo‘llanilgan.

Shuningdek, bo‘lim ish yurituvida fuqarolik ishlari bo‘yicha G‘uzor tumanlararo sudining 2013-yildagi sud buyrug‘iga asosan qarzdor O‘.A.dan undiruvchi M.X. foydasiga uch nafar voyaga yetmagan farzandining moddiy ta’minoti uchun voyaga yetguniga qadar har oydagi ish haqi va boshqa turdagi daromadlarining yarmi miqdorida aliment undirish to‘g‘risida ijro hujjati mavjud bo‘lgan. Qarzdorga aliment to‘lamaslikning huquqiy oqibatlari tushuntirilganidan so‘ng O‘.A. turmush o‘rtog‘iga 10 million so‘m miqdoridagi aliment pulini to‘lab bergan.