Farg‘onada 54 mln so‘mlik maishiy texnikalarning noqonuniy aylanmasiga chek qo‘yildi

Farg‘ona viloyatida bojxona boshqarmasi xodimlari tomonidan o‘tkazilgan tezkor tadbirda 54 million so‘mlik maishiy texnikalarning mamlakat hududiga noqonuniy tarzda olib kirilishining oldi olindi. Bu haqda “Daryo”ga boshqarma axborot xizmati ma’lum qildi.

Ma’lum qilinishicha, Farg‘ona viloyat Bojxona boshqarmasi kontrabandaga qarshi kurashish va bojxona auditi bo‘limi xodimlari tomonidan Marg‘ilon shahri va Qo‘shtepa tumani hududida tezkor tadbirlar o‘tkazilgan.

Tezkor tadbir davomida fuqaro B.N. boshqaruvidagi Cobalt avtomashinasi Marg‘ilon shahri hududida to‘xtatilib, o‘rnatilgan tartibda ko‘zdan kechirilgan. Natijada avtomashina saloni va yukxonasida xorijda ishlab chiqarilgan hamda bojxona rasmiylashtiruvidan o‘tganligini tasdiqlovchi hujjatlari bo‘lmagan umumiy qiymati 26,4 million  so‘mlik 2 turdagi 33 dona maishiy texnika borligi aniqlangan.

Shuningdek, D.H. boshqaruvidagi Cobalt avtomashinasi Qo‘shtepa tumani hududida to‘xtatilib, o‘rnatilgan tartibda ko‘zdan kechirilgan. Natijada avtomashina saloni va yukxonasida xorijda ishlab chiqarilgan hamda bojxona rasmiylashtiruvidan o‘tganligini tasdiqlovchi hujjatlari bo‘lmagan umumiy qiymati 28 million so‘mlik 2 turdagi 35 dona maishiy texnika borligi aniqlangan.

Hozirda yuqoridagi holatlar yuzasidan bojxona organlari tomonidan surishtiruv harakatlari davom ettirilmoqda.