“Uzbekistan Airways’ni sotish bo‘yicha rejalar bor, biroq hozir mavridi emas” — transport vaziri

O‘zbekiston hukumati Uzbekistan Airways’ni sotishga tayyor, biroq hozircha buning mavridi kelmadi, deb xabar beradi “Podrobno”.

“Milliy aviakompaniyani sotish borasida to‘xtaladigan bo‘lsak, bu borada rejalarimiz bor, biroq yaqin kelajakda emas. Chunki u hozirda xorijiy investorlarni yetarlicha jalb etmaydi. Qarzlar masalasi hal etilgach va qulay sharoit yaratilgach bu masalaga, albatta, qaytamiz”, — deydi transport vaziri va Uzbekistan Airways boshqaruv raisi Ilhom Mahkamov.

Avvalroq Uzbekistan Airways va yana 14 kompaniya IPO o‘tkaziladigan kompaniyalar ro‘yxatiga kiritilgani, aviakompaniya Parij, Rim va yana dunyoning 7 ta shahriga amalga oshiriladigan reyslarini yopishi to‘g‘risida xabar berilgandi.